Ronaldo sawmna a pawimawh - Jorge Jesus

Jorge Jesus chuan, "Cristiano Ronaldo hnen aṭangin sawmna dawng lo ilang chuan Al Nassr head coach atan ruat ka ni lo ang," tiin a sawi.

Al Nassr hian season liam ta khan Stefano Pioli hoin Saudi Pro League (SPL)-ah pathumna an ni a, Pioli thlak nan kum 70 mi Jesus hi an la lut.

Portuguese manager Pioli chuan, "A sawmna tel lo chuan Al Nassr-ah hian ka awm dawn lo. Ronaldo hian a kalna apiangah nomawi lak theih zawng zawng a la zel a, Saudi Arabia-ah erawh a la la lo. Kuminah ka pui thei ang. Ṭawng inang kan hman avangin harsatna tur a awm lo a, Cristiano chona kha chu hnar phal lo a ni," tiin a sawi.

Ronaldo hian January 2023 khan Al Nassr hi a zawm a, match 111 aṭangin goal 99 a khung tawh mah se SPL nomawi a la chawi loh bakah Asian Champions League-ah hlawhtlinna a la chang lo.

Al Nassr manager thar Jesus hian Benfica pawh enkawl tawhin kum 2015 khan Benfica hmelma Sporting a enkawl a, sawi zui a hlawh hle. Saudi Arabia-ah pawh Al Hilal a enkawl tawh a, tunah an hmelma Al Nassr a zawm leh bawk.

Jesus chuan, "Saudi Arabia hi nuam ka ti a, he ram hian football leh thildangah pawh hmabak êng tak a nei a ni. Tun ṭuma Saudi-a ka let hi ka lawm a, ka kalnaah ka champion ziah a, champion leh ngei pawh ka tum ang," tiin a sawi.