MBBA Inter Veng 2025: Dawrpui VT leh Zarkawt an chak

LESDE MBBA Inter Veng Basketball Tournament quarterfinal-ah Dawrpui Vengthar leh Zarkawt ten July 15, Thawhlehni zan khan Ramthar Veng leh Bungkawn hnehin semifinal an lut. Nizan khan R. Dengṭhuama Stadium-ah final khel tur zawnna neih a ni a, result kan hre hman lo.

Ramtharin Zarkawt BCA guard Zonuna kawl mah se Dawrpui Vengtharin an hlau lo a, ṭan phat aṭangin a khel ṭha zawk hrim hrim. Dawrpui Vengthar tan Jonathan, Dina leh Dede te an khel ṭha a, quarter hmasa pathumah an khel ṭha zawk vek.

Quarter thumna a zawhin 62-43 a ni tawh a, point 19-in an sang fal tawh. Quarter tawp berah Ramthar hi 26-15 in chungnung zawk mah se chak phu zawk Dawrpui Vengthar 77-69 in an chak.

Semifinal hnuhnung berah team ṭha pahnih Zarkawt leh Bungkawn te an inkhel a, beisei lawk ang ngeiin inkhel a nung ṭha. Team ṭha zawka ngaih Bungkawnin bul an ṭan ṭha zawk a, Ṭhazuala telna team hian 19-13 in quarter hmasa bera hma an hruai nghal. Mahse, Matthew Remtluanga Sailo hoin Zarkawt rawn tho chhuakin 25-13 in quarter hnihnaah an chungnung zawk a, half time-ah Zarkawt-in 38-32 in hma an hruai ta zawk.

Third quarter-ah Zarkawt an che ṭha chhunzawm a, chutihrualin Bungkawn lamin tlawm an duh lo tih a chiang. Zarkawt hian third quarter zawhah 56-47 in hma an hruai a, an dinhmun erawh a la him lo. Bungkawn tan R-a leh Ṭhazuala te fourth quarter-ah rawn che ṭha mah se Zarkawt an ṭangtluan a, 70-67 in an chak hram. A bul leh a tawp che ṭha Bungkawn an vanduai thung.