West Ham-in Diouf la lut

Premier League club West Ham chuan defender thar an nei a, Slavia Prague aṭangin El Hadji Malick Diouf chu pound maktaduai 19-in an la lut.

Kum 20 mi Diouf hian Hammers hi kum rei zawk atan a zawm, tiin tarlan a ni a, a rei zawng tak erawh hriat a ni lo thung.

Senegal tana vawi li inlan tawh left back hian Norwegian club Tromso aṭangin a professional zinkawng a zawh ṭan a, January 2024 khan Slavia Prague a zawm.

Czech club hi season hman zawh takah khan league nomawi a chawipui a, an champion theih nana player thawhhlawk a ni. Diouf chuan, "Club tam takin min sawm a, mahse, ka tana ṭha ber tur ngaihtuahin Hammers ka zawm a ni," a ti.

Diouf chuan sawi zawmin, "West Ham ṭantute, inzinga ka tel thei hian min tilawm hle a, season duhawm tak kan hman ho ka beisei. Premier League khelh hi chu kan duh vek," a ti a, EPL khelh chu footballer-te duhthusam a nih thu a sawi.

West Ham manager Graham Potter chuan, "Kum naupang tê a ni a, hlawhtlin a duh a, tum sang tak a nei bawk. Kan team-in kan ṭhatpui ka beisei," a ti.

Kum 18 mi lek ni chunga Senegal chhuahsantu Diouf hian season hman zawh takah khan match 41 khelin goal sarih a khung a, assist vawi li a nei bawk.

Czech top flight league-ah Slavia a champion pui a, point 16 ngawta sang fal chungin champion nomawi an chawi - match 35-ah goal 18 chiah an chhuah.