Hmasawn la tum reng Hendo

Kum 35 mi Jordan Henderson chuan Brentford a zawm hnuah, a kum tam tawh mah se, hmasawnna tur a la awm reng thu a sawi a, Premier League club-ah a tikimtu mai nih a tum lo.

Hendo chuan, "Ka tawnhriatte player naupang zawk tan hman ṭangkai ka tum dawn a, chutihrual chuan a ṭha thei ang bera khelh a, khelmuala ka hnate thawh tho ka tum dawn bawk.

"Theihtawp chhuahin ka khelhpuite puih ka tum dawn, tih chu thil chiangsa a ni a, mahse, ka kum angah pawh zir tur tam tak ka la nei a, hma ka la sawn thei a, hei aia ṭha zawk ka la ni thei - chu chu Brentford-ah hian tih ka tum a ni," a ti.

Liverpool captain hlui Hendo hian Anfield-ah kum 12 hun a hman hnuin July 2023 khan Saudi Arabian club Al Ettifaq a zawm a, mahse, thla ruk chiah a khel hman.

Dutch club Ajax a pan zui a, season khat leh a chanve a khelh hnuah a contract titawpin, Premier League-ah a lo kir - World Cup 2026-a England jersey hak chu a tum ber a la ni.