City-in Puma ha zel dawn

Manchester City chuan an thawmhnaw siamtu, brand lar Puma nen kum 10 dang tal thawk ho leh turin contract thar an ziak a, an inremna zat hi pound tluklehdingawn khat vel niin an sawi - Premier League-a thawmhnaw siam lam inremnaa sum la tam ber ṭum a ni.

City hian kum 2019 aṭang khan Puma hi thawhpui ṭanin, kum khatah Premier League club hian £65mtd an dawng ṭhin. Pawl pahnihin inremna thar an ziak leh ta a, kum 2035 thleng chu ngei ngeiin an thawk ho dawn.

Premier League club hian Puma thawmhnaw an hak dawn avangin, kum tin German kit manufacturer aṭang hian £100mtd an dawng ziah dawn a, Manchester United an khum.

Red Devils hian adidas thawhpuiin, kum khatah £90mtd an dawng ṭhin a, hei hi record ding lai niin, City hian an khum ta a ni. EPL champion Liverpool pawhin season thar aṭangin adidas an ha tawh dawn a, season khatah £60mtd an dawng dawn thung.

City hi sumdawnnaah an ṭhang nasa a, club jersey pawh an hralh nasa ṭhin hle. June 2024 khan an club report hnuhnung berah chuan, season khat chhungin £715mtd an la lut a, sumdawnna aṭanga an sum hmuh hi £341.4mtd aṭangin £344.7mtd-ah a sang chho dawrh thei.