Frankfurt-in Magpies an hnar

Newcastle United chuan Eintracht Frankfurt forward Hugo Ekitike chu lakluh tumin German club hi an dawr a, mahse, Frankfurt hian pound maktaduai 70 ngawta Magpies dawrna chu an lo hnar.

Kum 23 mi Ekitike hian season hman zawh takah khan Eintracht Frankfurt tan inelna hrang hrangah match 48 khelin goal 22 a khung a, assist vawi 12 a nei.

Magpies hian French striker hi an dawr nawn dawn em hriat a ni lo a, £70mtd pawh hian la lut se, an club player man to ber a ni dawn.

Hetihlai hian Liverpool chuan Newcastle player man to ber ni lai, kum 2022-a Real Sociedad aṭanga Magpies-in £63mtd-a an lakluh, Alexander Isak chu an lo hel ve mek bawk.

Magpies chuan an striker hi zawrh lai a nih loh thu an sawi tawh a, Eikitike pawh hi Isak thlaktu tur ni loin, a khelhpui tura lakluh tum an ni.

Kum 25 mi Isak hian season hman zawh takah khan English club tan match 42-ah goal 27 ngawt khungin, assist vawi ruk a nei - Liverpool hian an la lut thei dawn a nih pawhin £130mtd tal insen an huam a ngai dawn.

Ekitike pawh hi Liverpool hian an thlithlai tho nia sawi a ni a, mahse, an duhthlanna hmasa Isak an lak theih chuan Paris Saint-Germain striker hlui hi chu lakluh an tum tawh kher lo ang.