Olympic 2026 chungchang sawi ho

Sports & Youth Services (SYS) Department chuan nimin khan Directorate of Sports & Youth Services Conference Hall-ah sports discipline 34 aiawhte nen Vision Olympics 2036 chungchanga inrawnkhawmna hun an nei.

SYS joint secretary H. Dolianbuaia chuan, "Mizoram aiawha chhuakte’n National Games hrang hrangah medal 50 vel an lak tawh a. Olympics-a tel tura hmathlir neih chu a pawimawh a, sawrkar pawhin hma a la chhunzawm zel dawn.

"Infiamna chu eizawnna tlak, kan ram economy atana thawhhlawk a nih mai bakah ruihhlo laka kan thalaite chhahchhuahna kawng ṭha tak a ni. Vision Olympics 2036 chu a tak ram chantir tur leh infiamna chawisang tur chuan kan 'Education System' nen a kal rual a ngai a, nu leh pate leh khawtlangin kan infiammite pawh kan dâwm chhoh zel an ngai a ni," a ti.

Henry C. Lalrawnkima, Mizoram State Sports Council (MSSC) Secretary chuan sorkar hmalakna hrang hrangte tarlangin, "2036-a India ramin Olympics thlen a tumnaah hian India aiawha Mizo infiammite an tel theihna tur dap mek a ni. Coach-te chu mi thiamna leh theihna phawk chhuak thiam, infiammite theihna tipung tur leh hlawhtlinna chang thei tura tuaihriam thiam mi an nih avangin Vision Olympics 2036 tihhlawhtlinna tur hian an pawimawh hle," tiin a sawi.

Inrawnkhawmna hun hi SYS Deputy Secretary Marilyn Rualzakhumthangi'n kaihruaiin, Sports Discipline hrang hrang coach-te leh association aiawhte aṭangin Olympics 2036 atana an hmalak mekna, hmalak tum dan, leh hmathlir ngaihthlak ni a ni.

Directorate of Sports & Youth Services-te hian he inrawnkhawmna hun an buatsaih hma hian sports discipline hrang hrang aiawhte aṭangin report an la khawm a. Report-te leh nimina sawi hona hun aṭangin ruahmanna kalpui dan tur pawimawh zual siam a, Vision Olympics 2036 atana inkaihhruaina leh rawtnate siam an tum a ni.