Silly Point: Kartawp titi

Rokhawhna dang a awm loh chuan chawlh lailawk leh hahdamna hun an hman hnuah Shubman Gill leh a hote chuan vawiin lam hian Manchester khua an pan anga, tum nga inkhelh tur Test Series-ah 1-2 in hnufual zawk chungin tun Nilaini hian Old Trafford, Manchester-ah England nen an intum leh ang.

India chetsualna

Headingley leh Lord's lama an chak loh chhan kan thailang nual tawh nachungin Lord's inkhela run 22 leka an chak lohna chhan bulpui zingah chuan India bowler-ten extra 63 zet an khilai kha a tih loh theih loh bawk.

Tin, Edgbaston-a hero, silly point column hial luah thei Akash Deep an fak a dawl lo riau a, tun Lord's inkhelah kha chuan batsman te run chi hrang hrang khilai dan tur khawvel hmuhah a rawn phochhuak a ang ta ber awm e.

Kutphah mawm

Test hmasa ber Headingley-ah khati zat mai ball an man ṭhelh avanga chak loah kan puh tawh a. Tun Lord's inkhelah pawh khan England Jamie Smith kha run nga chiah a siam lai khan awlsam taka man theihna hun ṭha an hlah leh a, half century a siam zui a nih kha.

Indian fielding coach T. Dilip-a'n a naute ho a hrual ṭhat leh deuh chu an ngai tih a chiang reng mai.

Chuan....

Jasprit Bumrah inkhelh tur bik thlansak/phalsak policy chuan sawisel a hlawh chho ta zel a. Chak loh miau chuan selna anka an dawn tur zinga mi kha a ni sa reng a ni. England-ah ro ro pawh, Old Trafford, Manchester hi fast bowler te hlawhtlinna mual a ni ṭhin a, ball a swing nasain a lei a char ṭhat vang a ni a. Tuifinriat kama awm Manchester khua hi ball chetna tawk vel tura thlifim an dawn ṭhat vang a ni bawk.

India-in series-ah hnenah chan an tum chuan final ang tluka pawimawh he Manchester inkhelah hian a siruk lain, an sahuai zawng zawng an ser a ngai ang. I lo thlir zel phawt ang. Kartawp hman nuam vek u le.