Newcastle-in Wissa an ngaihven

Liverpool-in Hugo Ekitike an chhuhsak hnuah, Newcastle United pawhin striker dang an zawn chhunzawm ve nghal a, Brentford striker Yoane Wissa an ngaihven.

Magpies hian an thiampuipa Alexander Isak chu zawrh lai a nih loh thu Liverpool hrilh pahin, Isak-a kawppui tur an zawng nghal a, mahse, Ekitike lakluh tuma pound maktaduai 70 an thehchhuah chu Frankfurt lamin an lo hnar.

Ekitike hian Anfield pan a duh zawk hrim hrim nia sawi a nih bawk avangin, Magpies hian hun seng tam loin Brentford lam an hawi nghal a, Wissa lakluh ngei tumin an bei nghal.

Hetihrual hian Wissa hi Newcastle chauhin an duh lo a, Tottenham Hotspur leh Nottingham Forest pawhin an ngaihven avangin Eddie Howe-a tan chan mai a awlsam dawn lo.

Brentford hian Wissa hi hralh loh dan an ngaihtuah nia sawi a ni a, Manchester United-in forward dang Bryan Mbeumo chu £70mtd tala lakluh tumin an lo hel ve reng bawk.

Kum 28 mi Wissa hi 2023-24 season thleng kha chuan striker a la ni lo a, attacking midfielder angin a hun tam zawk a hmang. Mahse, Brentford hian Saudi Pro League lama £40mtd ngawta Ivan Toney an kaltir hnuah, khaw dang hawi loin Wissa hi striker-ah an chher.

DR Congo international hian striker a nih meuh chuan a professional career-a season khata goal a khung hnem ber record a siam a, season hman zawh takah khan match 39 khela goal 20 khungin, assist vawi nga a nei.

Wissa rimtu Newcastle hian Nottingham Forest aṭangin Anthony Elanga chu pound maktaduai 55-in an la lut tawh bawk a, Champions League khel turin an inthuam chak zel.