Aditi Chauhan-i'n inkhelh chawlhsan

Indian hmeichhe professional footballer zinga Europe-a inkhel hmasa ber, goalkeeper Aditi Chauhan chuan inkhelh a chawlhsan thu a puang a, kum 32 mi niin a ballboot a khai ve dawn ta, tihna a ni.

Aditi chuan, "Football - tun dinhmun min thlenpui a, min fiah a, min kaihhruai avangin ka lawm e. Kum 17 zet hun duhawm tak ka hman hnuah, football chu hlim leh lawm tak chungin ka thlah ta," a ti.

Chennai nula Aditi Chauhan hian India tan match 57 a khel hman a, Loughborough University-ah Msc (Sports Management) zirin, an college football team tan a inlan a, kum 2015 khan West Ham chuan an la lut.

Aditi chuan, "Zirna leh ka tuina football-ah a khawi emaw zawk zawk thlan kher ngai loin, a pahniha tikawp turin theihtawp ka chhuah a, kha khan min chher hriam a ni," a ti.

India si ban nghaktu rinawm ṭhin hian English club tan hian season hnih a khel hman a, a hnuah India-ah lo kirin, India Rush SC, Gokulam Kerala, Hamar Hveragerði leh Sreebhumi tan a khel a, Gokulam hi Indian Women's League-ah vawi hnih a champion pui.

India hmeichhe team tan SAFF Women's Championship 2012, 2016 leh 2019-ah te champion nomawi a chawi a, South Asian Games-ah gold vawi hnih a hlawhchhuahpui bawk.