Antony hi ka fapa ang a ni - Ten Hag

Manchester United manager hlui Erik ten Hag chuan Old Trafford chhuahsan thei dinhmuna ding mek, forward Antony chu a fapa ang mai a nih thu a sawi a, chutihrual chuan a club enkawl mek Bayer Leverkusen-a kal tur anga an sawi erawh, "Lakluh tumna kan nei rih lo," a ti.

Ten Hag hian Real Madrid enkawl tura chhuak ta, Xabi Alonso thlakin Leverkusen a enkawl a, Manchester United-in an ban hnua club a enkawl leh hmasak ber tur a ni.

Dutch coach chuan, "Antony hian theihna sang tak a nei a, club pahnihah ka la lut hial a ni. Ka tan chuan fapa ang mai a ni a, a la ni reng bawk. Mahse, tunah chuan lakluh tumna kan nei rih lo a, nakin zel erawh sawi theih a ni lo," a ti.

Antony hian kum 2022 khan Ajax chhuahsanin Manchester United hi pound maktaduai 86-in a zawm a, beiseina sang tak nen Red Devils fan-ten lo thlir mah se, match 96-ah goal 12 chiah a khung a, assist vawi nga a nei.

Season hman zawh takah khan, season chawhnu lam chu Real Betis-ah loan-in a khel a, match 26-ah goal kua a khung a, assist vawi nga a nei bawk - tun nipuia chhuak tura sawi a ni a, a chhuah ngei pawh a rinawm.

Khawthlang media-ten an tarlan dan chuan Premier League club zingah Brighton & Hove Albion leh Newcastle United chu Antony duhtu zingah an tel a, German club RB Leipzig leh Real Betis hming lam rik a ni bawk.