Martin-a'n chhuah tumna a nei lo

MotoGP champion lai Jorge Martin chuan a team Aprilia chhuahsan tumna a nei lo a, season thara inelna an hmachhawn leh huna pawh Aprilia bike bawk khalh chhunzawm zel a tum tih a sawi chiang.

Pathianni tlai dar 5:30 hian Masaryk Circuit-ah Grand Prix of Czechia an tlan dawn, hemi puala chanchinbu mi a kawmnaah Martin chuan, "Mihring chu hmasawn zel tur kan ni a, hma lam pana kan kal dawn chuan thutlukna lian tham kan siam a ngaih chang pawh a awm.

"Tun hnaiah zawhna ka dawng hnem a, chanchinbu ṭhenkhat chuan ka hma hun chungchang an ziak nasa hle tih pawh ka hria. Tuna ka sawi chian duh chu, season tharah pawh Aprilia team tan ka tlan zel ang," tiin a sawi.

Kum 27 mi Martin hi hliam vangin thla li deuh thawh a intlansiak ve thei lo. Season thar inbuatsaihna neih laiin a chesual a, hei vang hian intlansiak hamasa pathum a hmachhawn thei lo. April khan Qatar-ah a rawn kir a, mahse chesual lehin a chawl chhunzawm leh a ni.

Spanish rider Martin tan a nomawi kawl lai chu hum ngaihna a awm tawh lo, chutihrualin season chawhnu lamah theihtawp chhuah erawh a tum - atan season thar inbuatsaihna a ni chho ṭan leh nghal ang.

Martin chuan, "Ka tana ṭha tur zel ka ngaihtuah ve a ngai a, ka team lam pawhin kan ṭhat tlanna tur an ngaihtuah bawk. Ngun leh fim taka ka ngaihtuah hnuah pawh Aprilia hian beiseina min neih tir, ka tana ṭha tur chu a ni tih ka hria.

"Team chhung boruak a nuam a, hun harsa leh hrehawm kan hmachhawn ho theiin hun hlimawm tawn dan pawh kan hria, hetiang boruak nuam tak hi hmun danga neih mai theih a ni lo. Chuvangin rin leh zual zawkin kan bei ho dawn a ni," tiin a sawi.

Intlansiakna a hmachhawn mumal loh rei avangin Martin tan vawi leh khata chet ṭhat hluai a harsa in a rinawm. Tun kar tawpa intlansiak tur atan pawh beisei chu nei mah se, result ṭhat tak neih nghal erawh a beisei ngam bik lo.

Martin chuan, "Intlansiak ka hmachhawn ve theih loh te kha 6,000 km a tling, chuvangin kei aia midang tlan ṭhat leh an chet velna a tam hle. Chuvangin dawhthei taka ka nghah a ngai dawn a, inelna ka hmachhawn ve leh thei tur chauh pawh hi lawmna tham a tling.

"Nakinah chuan hlawhtlinna chan hun a la thleng ve leh turah ngai ila. Dawhthei taka kan nghah chuan kan nghak chhuak ve leh mai ang, beidawng loa kan beih erawh a ṭul dawn a ni," tiin a sawi.

Khawvela bike intlansiakna sang ber MotoGP-ah hian Marc Marquez chuan point 344 hmuin hma a hruai mek, amah hnaih bertu chu a unau Alex Marquez niin ani hian point 261 a hmu thung a, midang tan umphak an harsa tawhin a rinawm.