Turin-ah ATP Finals khel zui dawn

Italian Tennis and Padel Federation te chuan Turin khawpuiah ATP Finals an khel chhunzawm dawn tih an sawi a, kumin leh nakkumah chuan khawpui dangah khelh tumna a awm lo tih a chiang nghal bawk.

Association of Tennis Professionals (ATP) chairman Andrea Gaudenzi chuan nikum November khan Italian federation nen inremna thar an neih thu a sawi tawh, an inremnaah chuan kum 2030 thleng Italy hian ATP Finals hi an thleng dawn a ni.

Season khat chhunga mipa tennis thiam zual pariatte inelna hi Italy chuan Turin khawpuiah a thleng ṭhin a, tun hnaiah politics boruak vanga sawiselna hrang hrang a awm, hei vang hian Milan khawpui lamah an sawn mai rinna pawh a lian hman.

Mahse, Italian federation president Angelo Binaghi chuan, "A rei lo berah pawh kum 2026 thleng chu Turin-ah ATP Finals hi khelh a ni ang," tiin a sawi a, hetih rual hian sorkar vawng vuantu inthlak vangin a hmun sawn theih a nih thu a sawi ve bawk.

ATP Finals hi London chuan kum 12 chhung a lo thleng tawh, chumi hnuah kum 2021 aṭang khan Turin hian a thleng ve leh ta chiah. Tun hnaiah mipa world number 1 Jannik Sinner chungchang titi a tam a, hei hian nghawng a nei ni pawhin a lang.

Italian tlangval Sinner hian nikum khan damdawi hman phal loh a hmang a, endikna vawi hnih ngawt a paltlang zo lo. Mahse, a tirah hrem a ni mai lo, kuminah thla thum chhung hrem a ni a, hrem a nih hun hi Grand Slam khelh loh karah tak a tla bawk.

Tennis player ṭha leh langsar tam takin Sinner chungchang hi an sawisel, an sawi chhunzawm zel dawn ni pawhin a lang. Season hmasa ATP Finals-ah khan Sinner hi a champion, an ramah inelna neih a nih avangin kuminah pawh titi a ti tam leh ngei ang.