Jabeur-i a chawl rih dawn

Grand Slam final vawi thum khel tawh Ons Jabeur chuan tennis chawlhsan lailawk a tum, kum 30 mi Jabeur inkhelh a chawlhsan tlang val vek dawn tihna erawh a la ni lo thung.

Jabeur hi Arab hmeichhe zinga Grand Slam khel thei hmasa ber a ni a, major title la hlawhchhuak chiah lo mah se mi hriat a hlawh - a bik takin Arab ramah a lar zual a, player ṭha dang an neih mai loh avangin an ngaihlu hle bawk.

Wimbledon final vawi hnih khel tawh Jabeur chuan, "Tun hnai kum hnih chhung hian hmasawn tumin ka bei nasa lutuk a, keimah leh keimah pawh kan in nawr chau lutuk ta deuh. A nihna takah chuan tennis court hi nuam ka ti rih lo.

"Tennis hi infiamna mawi leh ngainatawm tak mai a ni a, kei ngei pawhin he infiamna hi ka hmangaih hle. Mahse, nuam ti leh hlim taka ka inkhelh leh theih hin ka nghah a ngai a ni," tiin a sawi.

Jabeur hi a khelh ṭhat lai chuan world number 2 hial pawh a lo ni tawh. Mahse, kumin Australian Open khelh lai khan thawh hah vangin a buai a, inelna lian Wimbledon khelh zawh hlimah khan match hmasa ber a khel zo thei lo bawk.