Tennis chawlhsan tur Bouchard

Hmeichhe tennis world number 5 pawh ni tawh, a inkhelh thiam bakah hmelṭhat vanga hriat hlawh Eugenie Bouchard chuan tennis a chawlhsan dawn tih a sawi, kum 31 mi chauh la ni mah se professional tennis atan tournament pakhat bak khelh a tum tawh lo.

US Open inbuatsaihna zinga mi National Bank Open chu August-ah khelh a ni dawn, hemi bak hi Bouchard chuan inelna hmachhawn a tum tawh lo tih a sawi a, a tan Montréal chu tennis zinkawng tawpna a ni ang.

Canadian star Bouchard chuan, "Montreal hi tennis zinkawng bul ka ṭanna hmun a ni a, he hmunah bawk hian ka hun tawp chu ka hmang ang," tiin social media lamah a tarlang a, a naupan lai leh tournament a khelh hmasakna thlalak a pho lang bawk.

Tournament director Valerie Tetreault chuan, "Genie-i'n a hun tawp hman nana min thlang hi a lawmawm, keini chuan a tir aṭanga a tawp thlengin ṭha takin kan thlawp ang. Tennis tana mi hlu a ni a, a bik takin Canadian mite tan a hlu zual," tiin a sawi.