Sarri-a'n team training a ho thei leh ta

Damlohna vanga enkawl a nih hnuah Maurizio Sarri a dam leh tawh a, nimin tlai khan a team Lazio chu training a neih pui leh nghal - Serie A season thar lo awm tur atan inbuatsaihna an nei chho mek.

Italian coach hi a damloh avangin Villa Mafalda Clinic, Rome-ah dahluh a ni. A damloh chungchangah Lazio chu ngaihtuah awm leh na lutuk a nih loh thu an sawi, hun rei vak lo hnuah damdawi-in pawh a chhuahsan leh thei ta mai a ni.

Kum 66 mi Sarri hian mei a zu nasa hle a, hei vang hian harsatna a lo nei fo tawh - kum 2019 pawh khan pneumonia vangin enkawl a lo ngai reng tawh bawk, a mei zuk hi tun thlengin a la sim thei chuang lo.

Lazio player zingah Mattia Zaccagni, Patric leh Elseid Hysaj te an dam chiang rih lo, season thar an inbuatsaihna match hmasa atan Pathianni tlai hian an youth team nen an inkhel dawn a ni.