Xhaka hma hun a chiang lo

Granit Xhaka chu hma hun chiang loin a awm mek a, a khelhna Bayer Leverkusen sporting director Simon Rolfes chuan an midfielder chu a hma hun ti chiang thuai turin a phut.

Premier League kai thar Sunderland leh Saudi Pro League club thar tho Neom SC te chuan Xhaka hi an ngaihven a, Swiss midfielder hian BayArena chhuahsan a tum thu la sawi chiah lo mah se, club dang aṭanga ngaihventu a neih hi a lo bengkhawn niin an sawi.

Leverkusen sporting director Rolfes chuan, "Ngaihventu chu a nei ngei mai, mahse engmah thu chiang a la awm lo. Season thar atan team ṭha tak din ngei kan tum, chumi atan chuan Granit hi mi pawimawh tak pawh a ni leh ang.

"Nipui bazar kan hmang mek a, thil tam tak chu a insiksawi ngei mai. Granit pawh hian a hma hun a tih chian thuai kan beisei," tiin a sawi a, theih ni se la chuan Switzerland international chu chelh theih ni se a duh thu a sawi bawk.

Leverkusen hian Xabi Alonso kaihhruaina hnuaiah 2023-24 season khan Bundesliga nomawi an chawi, season hmasa erawh kha chuan Bayern Munich lakah an nomawi kawl lai an chan a, pahnihnaah an lungawi a ngai thung.

Nipui bazar a rawn inherchhuak a, coach Alonso chuan Real Madrid a pan san. An player ṭha - playmaker Florian Wirtz leh wing-back Jeremie Frimpong te chuan Liverpool an pan san leh tawh bawk.

Manchester United manager hlui Erik ten Hag chu coach atan an la thung a, England U21 defender Jarell Quansah leh Netherlands international goalkeeper Mark Flekken te an neih bak chu player ṭha lakluh an la nei lo thung.

Leverkusen hian Brazil-ah season thar inbuatsaihna an nei mek - season thar an match hmasa atan German Cup an khel dawn a, chumi hnuah Bundesliga bul ṭan nan Hoffenheim an tum leh dawn a ni.