Kan boruak a danglam tawh - Arteta

Arsenal manager Mikel Arteta chuan Brighton an hneh hnuah an team chu an boruak a danhlam tawh tih a sawi. Gunners hian tun hnai an match hnuhnung pahnihah hnehna an chang a ni.

Krismas hma kha chuan, English striker ropui Alan Shearer meuh pawhin Arsenal hi kum 1919 hnu lama a vawi khat nan Premier League aṭangin an tla ve mai thei, tiin a sawi hman hial.

December 19 khan Everton lakah an tlawm a, hetih lai hian relegation zone aṭanga an himna chu point li chauh a ni. 1974-75 season hnu lama bul an ṭan chhiat ber ṭum an tawn avangin sawisel an hlawh nasa.

Mahse, an elpui Chelsea 3-1 in an hneh. Thawhlehni zan Premier League inkhelah Alexandre Lacazette goal khat hmangin Brighton 1-0 in an luhchhuah zui leh bawk.

Gunners manager Arteta chuan, "Kan tana hnehna chan pawimawh zia kan hria, hun harsa tak karah hnehna kan chang thei a, chu chuan inrintawkna min siamsakin kawng dikah min hruai.

"Kan tana damdawi ṭha ber chu hnehna chan hi a ni, tunah chuan a hma lama kan boruak nen kha chuan a in ang tawh lo hle - khawvel dangah kan cheng tawh. Mitin rilru a hlim vekin ka hria," tiin a sawi.

Spanish manager hian 2019 December thla aṭang khan Arsenal hi a enkawl. Tun hnaiah an result ṭha lo vangin sawisel hlawh mah se club thuneitu lamin an thlawp tlat a, tunah chuan an insiamrem leh dawn ṭan niin a lang.

Gunners hian Inrinni zanah team talbuai West Brom an hmachhawn zui leh dawn a, inkhel dangah Brighton chuan Wolves an mikhual zui ve leh nghal ang.