Dina tawpna a la ni lo

Infiamnaah lar bik an awm ṭhin a, Mizo basketball-ah chuan Laldinsanga (Mapuia) leh Lalrina Renthlei te an langsar. Chutihrualin Mizoram basketball-in tun dinhmun a thlen theihna kawngah Tuikual South final thlenpuitu F. Zodinthara'n hmun pawimawh a chang a, chutiang bawkin Zarkawt champion-na atana thlawh hlawk Lalrempuia Vaiphei hming lam hmaih a thiang lo.

Dina hi hming langsar ber a ni lo nachungin basketball chhungkuaah Dina hre lo an awm lo a, Tuikual South-in veng tana a thawh hlawk em avangin vengchhungah a tla na hle.

Final-ah pawh Dina pual banner hmuh a ni a, chutah chuan, "Last Dance 'The General' - 2005-2025 GOAT - Tuikual South tan i theihna zawng zawng i hlan hi kan theihnghilh tawh lo ang," tiin a inziak a, hei hian Dina inpekna chu a tichiang mai awm e.

Dina chuan, "Chawlh lo tura min ngen hi an tam a, kei pawhin pahnihna nichunga tawp ai chuan nomawi nena tawp ka duh. Chawlh mai aiin ka khelh zel hi ka la ring zawk, " tiin Vanglaini a hrilh a, banner-ah 2005-2025 GOAT tiin inziak mah se Dina khel hmuh tur a la awm dawn.

Final zanah MSL ṭantirh lamah Tuikual South boruak ang kha hmuh tur a awm leh a; "Phengphehlep ṭial mawi te, Phengphehlep ṭial mawi te,

Tuikual a hrùt del del," tiin an zai rual leh ta. Tun ṭumah nomawi chawi lo mah se veng mipuiin an phur tlat chuan nomawi chu an la sual chhuak ngei ang.