Poirier a tlawm - MMA a mangṭha ta

MMA fighter ropui Dustin Poirier chuan MMA a mangṭha ta - nimin khan American fighter rothap hian octagon chhunga a fight hnuhnung ber chu a hmachhawn a, BMF title inchuhnaah Max Holloway a ngam lo.

UFC 318, New Orleans-a fight hmuhnawm takah Holloway hi unanimous decision (48–47, 49–46, 49–46) a chak zawkah puan a ni a, Poirier-a'n chak loin a professional career-a a fight hnuhnung ber chu a thlah.

Holloway hian hnehna a chan hnuah lightweight champion Ilia Topuria a cho zui a, Poirier a zahna thu a sawi chhuak bawk. Holloway chuan, "Topuria nen hian eng thawnthu emaw chu kan lo nei ve tawh alawm.

"UFC, i chet a hun e," a ti a, kum 33 mi fighter chuan, "Zanin hi Dustin-a tan chuan a fight hnuhnung ber a ni a, zahna chibai i buk ang u," a ti zui.

Kum 36 mi Poirier hian MMA-ah vawi 41 fight hmachhawnin, vawi 30 hnehna a chang a, vawi 10 a tlawm - title hlawh chhuak si loah chuan MMA fighter ropui berah tam takin an ngai.

Poirier chuan, "Ka tawnhriat leh zinkawng ropui tak avang hian ka lawm em em a ni. Mipa naupang pakhat ve mai kha, nun duhawm tak pe a, a chhungte nun nuam zawk pe tura hun min siamsak avangin, UFC president Dana White leh UFC chungah lawmthu ka sawi a ni.

"UFC leh mixed martial arts chungah hian lawmthu sawisen loh ka ba reng dawn a, anni hian engkim min zirtir a, he zinkawng min zawhtir ve avang hian ka lawm a ni," a ti.

Poirier a chawl ta a, ropui taka champion kawnghren hlawhchhuah nei lo mah se, a zawna Conor McGregor a hneh te, Eddie Alvarez leh Justin Gaethje a hnehte chu khawvelin a hriatreng tawh tur a ni.