Olympic champion Zheng chawl rih dawn

A kui ding lam zai a nih hnuah Olympic champion Zheng Qinwen chuan chawlh hahdam rih a tum a, tun hnaia chuan tennis tournament awm ṭhenkhat ho chu a khel ve thei dawn rih lo a ni.

Kum 22 mi Zheng hi tunlai hmeichhe player ṭha berte zinga mi a ni phak - Wimbledon khelh zawh takah pawh khan seeded pangana a ni phak, mahse hneh nei loin grass court inelna lian hi a mangṭha.

World number 6 Zheng chuan, "Tunah chuan dam turin ka in enkawl ṭan a, tun aṭanga chawlh kar eng emaw zat, thla khat aia rei pawh a ni mai thei chhung chu chawlh rih ka mamawh dawn. A rang theui ang bera inkhelh leh duh mah ila, chawlh ka mamawh.

"Hlawhtling taka zai ka ni a, tunah chuan dawhthei taka nghah chu ka tih ve tur a ni. Hun khirhkhan ka tawh lai pawhin thlawptu ka nei ṭha, ka dam leh thuai thei nana duhsakna min hlantu zawng zawng chungah ka lawm," tiin a sawi.

Chinese star Zheng hian Paris Olympic 2024-ah khan gold medal a vaw chhuak a, WTA title panga a la tawh bawk. Nikum khan Australian Open final a lut bawk a, mahse Grand Slam nomawi tak chu a la chawi lo thung.

Grand Slam pali zinga a hnuhnung ber US Open chu August 24 aṭangin New York khawpuiah khelh a ni dawn; hard court inelna lianah hian tun hmain quarterfinal vawi hnih a lo khel tawh, kuminah dam taka inlan hman ngei a beisei ang.