Napoli ka zawm chhan Lukaku - De Bruyne

Belgian midfielder Kevin De Bruyne chuan ram tana a khelh pui ṭhin Romelu Lukaku chuan Napoli zawm turin a sawm tih a sawi a, Italian club a zawm chhan langsar tak zinga mi a ni bawk.

Manchester City tana contract a hman zawh hnuah De Bruyne hian man nei loin a duh ang club a zawm thei a, amah sawmtu tam tak zingah Napoli a thlang - Serie A champion tan hian chona thar a hmachhawn dawn a ni.

De Bruyne chuan, "Ram tana kan feh chhuah laiin Romelu nen kan inbia a, ani chuan an hnena kal turin min sawm. Kum 13 mi chauh kan nih lai aṭangin Romelu hi ka hre tawh a, kan inhrechiang tawk hle.

"Chelsea tana kan khelh dun lai pawh khan thla thum chhung vel chu kan lo cheng dun tawh. Italian ṭawng engkim a lo thiamsa tawh a, ka tan chuan an hnena va kal kha a awlsam phah hle. Coach nen pawh ṭha takin kan inbiak nghal theih phah," tiin a sawi.

Premier League midfielder ṭha berte zinga mi ni phak De Bruyne chuan, "Hun rei tak chhung chu Premier League ka chamchilh, a tawpah erawh England ka chhuahsan hun a lo thleng. Man City tan khan ka theihna zawng zawng ka hlan ṭhin.

"Tunah chuan chona thar hmachhawn a hun, a nihna taka chuan football level sang tak khelh theihna hun ṭha ka nei thei tur hi ka lawm," a ti. Serie A bakah Champions League an khel dawn, inelna a hautak dawn hle.

Thla hmasa khan De Bruyne hian kum 34 a tling a, a vanglai a pel ve tawh - season hmasa khan hliam vangin a buai fo a, manager Pep Guardiola hnuaiah a tlatlum tawh lo, tunah chuan Antonio Conte enkawlna hnuaiah chona thar a hmachhawn ang.