Isak a chhuah ka ring lo - Howe

Newcastle United manager Eddie Howe chuan a striker Alexander Isak chu a chhuah a ring lo a, Premier League season thar chu Isak-a ho ngei bul an ṭan theih a beisei thu a sawi bawk.

Magpies hian season thar inbuatsaih nan match an khel ṭan tawh, tun hnai khan Celtic lakah 4-0 in an chak lo. Celtic an hmachhawn ṭum hian Isak chu a inkhel ve lo, nipui bazar laia chanchin nei lian tak hi a hma hun a chiang lo mek.

Howe chuan, "Isak inkhelh loh chhan kha chu keima thutlukna a ni. A chungchang sawi a tam a, chuvangin inah lo awm hahdim rih turin ka duh. Ani kha chuan khel ve lo mah se a ṭhiante inkhel lai lo ṭawiawm kha a duh, mahse a remchang ta lo zawk.

"Alex hian Newcaslte hi a ngaina em em a, a khelhpui player mai bakah coaching staff pawh a ngaina hle, kei nen ngei pawh harsatna kan nei ngai lo.

"Chiang taka ka sawi ngam chu, nipui bazar hun hi a zo ang a, chutih hunah chuan Isak hi Newcastle United player a la ni reng ang," a ti. Sweden international hian Magpies tan season thum daih contract a la nei mek a ni.

Kum 25 mi Isak hian season hmasa Premier League-ah khan goal 23 a khung, ani aia khung tam chu Golden Boot dawngtu Mohamed Salah (29) chauh a ni. Real Sociedad aṭanga Newcastle a zawm hnuah English club tan hian match 109 aṭangin goal 62 a khung tawh.

Player ṭha leh theihna nei sang bik a nih avangin club tam takin an hnena khel turin an duh, mahse a man za tam avangin a duh nazawng tan lak theih a ni bik lo; tun hnai khan Reds nen sawi zawm a ni a, mahse Magpies chuan an theih anga hum an tum niin a lang.

Newcastle hian season tharah Champions League an khel dawn a, coach Eddie Howe enkawlna hnuaiah hma sawn zelin an player neih ṭhat te hum bakah squad tih chhah tumin hma an la mek a ni.