Marc Marquez tan nomawi a hnai ta!

Intlansiak hmabak a la tam, chutih rualin Marc Marquez chu MotoGP champion a ni leh ngei dawn niin a lang ta. Pathianni zana tlan zawh tak Czech Grand Prix-ah Marquez hi a chak ber.

Masaryk Circuit-a intlansiakah Marc Marquez a chungnung ber lai hian, championship lama amah hnaih bertu Alex Marquez erawh chesual zingah a tel thung - Marquez hian a nau Alex aiin point 120 tehmeuhin a hmu tam ta zawk a ni.

Kum 32 mi Marquez hian Inrinni khan Sprint Race-ah hnehna a lo chang tawh bawk a, atan chuan dinhmun sawhngheh theihna remchang ṭha bik a ni, a tir lamah erawh hmahruaitu ni thei turin a beih nasat a ngai ve hle thung.

Lap riatna an tlan lai aṭangin Marquez hian Aprilia bike khalhtu Marco Bezzecchi lak aṭangin hma a hruai fal thei ta a, a tawp thlengin thil a danglam tam tawh lo, tun season chhunga a vawi riat nan hnehna a chang, tun hnaiah a zawnin vawi nga a chak ta chiah bawk.

MotoGP hi chawlhkar thum chhung an chawl dawn. August 17, Pathianni tlai dar 5:30 hian Red Bull Ring-ah Austria Grand Prix an tlan leh dawn chauh a ni.

Champion tum

Ducati rider zinga a zawna vawi nga chak thei hmasa ber Marquez chuan, "Ka thil tum leh chak ber chu champion a ni. A nihna takah chuan champion sawi nan a la hma tih ka hria, mahse zawhna kan dawn chuan chhan a ngai ṭhin.

"Intlansiak hmabak 10 ngawt mai kan la nei, nasa takin thil a la danglam thei tih pawh ka hria. Tuna ka rilru put hmang ang hi neih chhunzawm zel ka duh a, chumi tur pawh chuan ka inbuatsaih reng bawk.

"Mimal record hrang hrang a lo thleng thei tih ka hria, chutiang thil erawh chuan min ti buai lo. A pawimawh ber chu ṭha taka intlansiak hmachhawn theih a ni a, chumi hnuah thil dangin a zui chauh tur a ni ang," a ti.

Spanish rider hian MotoGP huangah vawi 70 zet mai hnehna a chang tling ta bawk a, bike intlansiakna sang berah hian chak tam pahnihna a ni. A chungah hian vawi 89 chak thei Valentino Rossi a la awm, Italian rider ropui hi a hnaih sawt hle.

A hnungah Bezzecchi

Hma a hruaina Bezzecchi-a'n hum reng thei lo mah se a beidawng duh lo a, lap 21 an tlan zawh thlengin pahnihnaah a tlan thei - ani hnungah hian Pedro Acosta leh Francesco Bagnaia te an thleng ve thung a, an tan result ṭha tia sawi theih a ni tho.

World champion vawi hnih ni tawh Bagnaia-a'n tun season chhunga a vawi khat nan a hmasa ber aṭangin inelna a hmachhawn a, mahse a tir lamah Marquez leh Marco Bezzecchi ten an tlan pel nghal avangin atan hmahruai let a harsa tawh a ni.

Champion lai Jorge Martin chu pasarihnaah a thleng thung - Martin hi hliam vangin a buai rei hle a, atan nomawi hum beiseina awm tawh chiah lo mah se theihtawp a la chhuah tho, a hliam a dam tawh avangin chanchin lawmawm a ni ang.

Season thar inbuatsaih lai khan Aprilia rider Martin hi a inhliam a, hun rei tak chhung a chawlh phah. April-ah khan Qatar GP tlan ve mah se hliam a tawrh belhchhah leh a, enkawl a nih leh hnuin tun hnaiah a dam leh ta chiah a ni.