AS Roma pan tur Ferguson

Brighton & Hove Albion striker Evan Ferguson chuan season khat chhung loan-a khel turin AS Roma a zawm dawn a, he thu buatsaih a nih lai hian medical a nei mek - he thuziak i chhiar meuh chuan a zawm fel tawh hial ang.

Republic of Ireland international Ferguson hian August 2021 khan Brighton tan a match hmasa ber khelin, September 2, 2023 khan Newcastle United laka 3-1 a an chak ṭumin hattrick a siam.

Ferguson hi Magpies laka hattrick a siam hian kum 18 chauh a la ni a, heti zat lek kum ni chunga EPL-a hattrick siam thei Michael Owen, Robbie Fowler leh Chris Bart-Williams te kiangah a hming a ziak kai.

Mahse, 2022-23 season-a PFA Young Player of the Year award dawng tura chhawpchhuah zinga mi hian beisei a phak lo zui a, Brighton-in pound maktaduai 100 hial an chhiar hman striker hi tunah chuan loan-in a chhuak leh dawn ta!

Kum 20 mi striker hian season hman zawh takah pawh khan West Ham-ah loan-in a khel a, February 2025 khan Hammers hi panin, match riat a khelhah goal a khung miah lo.

Hammers a pan hma hian Brighton-ah season chawhma lamah match 15 a khel hman a, goal khat a khung. Brighton boss Fabien Hurzeler-a'n a rin zui hmel loh tih a chiang a, Roma lam a pan ta.

Serie A club hian an centre forward Tammy Abraham chu Besiktas-ah season khat chhung loan-a khel turin an chhuah a, a hmun ruak luah turin Ferguson an la lut - Abraham hian a ngheta Besiktas zawm theihna dan a nei tel a, Ferguson hian a chet ṭhat chuan Italian club hi a nghetin a zawm zui lo ang, tih a sawi theih loh.