India tana inlan tur Rami

13th Asian Junior Taekwondo Championships (G2) chu July 25-26 chhung hian khelh a ni dawn. Kuching, Malaysia-a inelna neih turah hian Mizo nula Ramdingliani (TABF), Chanmari West chu below 49 kg-ah India tan a inlan dawn.

Inelna hmachhawn thei turin Ramdingliani hian Junior National, Dehradun-a khelh zawh takah khan gold medal a la a, hemi ṭuma medallist ten selection hi khelin, selection-ah hian final list thlan chhuah leh niin, Punjab-ah final selection neih leh a nih hnuah Rami hi thlanchhuah a ni.

India team hian Chandigarh University, Punjab-ah ngawrh takin training camp an nei a, vawiin hian Delhi Airport aṭangin inelna neihna tur hmun Malaysia an pan ang.

Chanmari West tleirawl Ramdingliani hi Taekwondo Academy of Best Friend aṭanga zir chhuak niin, tunah hian India rama Taekwondo zirna ṭha ber zinga mi NCOE Lucknow-ah a training mek.

Rami hian national leh international level-ah Mizoram tan medal 24 lai la tawhin, Mizoram inelna sang ber Champion of Champions title pawh kum 15 mi lek niin a lo la tawh bawk a ni.

Asian Junior Taekwondo Championship-ah hian India aiawhin mipa leh hmeichhia 10 ve ve an khel dawn a. Ram hrang hrang aṭangin player ṭhahnem tak an tel ang.