Asia-ah Liverpool zin

Premier League champion Liverpool chuan Asia-a an pre-season tour an ṭan a, player 29 hruai chungin Pathianni zan khan Liverpool an chhuahsan - Hong Kong an pan.

Liverpool hian July 26, Inrinni tlai dar 5:00-ah Standard Chartered Trophy khelin AC Milan an hmachhawn ang a, Kowloon, Hong Kong-ah European club ṭha pahnih hi an inkhel ang.

Reds hian Wataru Endo-te ram Japan an pan zui ang a, July 30, Nilaini tlaiah Japanese club ṭha Yokohama FM nen an inkhel ang a, Asia tour an neih chu a zo zui ang - England lamah an kir dawn.

Arne Slot-a enkawl team hian Anfield-ah Athletic Bilbao chu match hnih an khelhpui zui ang a, August 10 zanah FA Community Shield khelin, FA Cup champion Crystal Palace nen champion an inchuh ang.

Premier League champion hian August 15, Zirtawpni zanah season thar atana EPL match hmasa ber an khel dawn a, Bournemouth an mikhual dawn.

Reds hian pre-season match hnih khel tawhin, Championship club ve ve an la hmachhawn a, Preston North End chu mipui hmaah 3-1 a hnehin, entu awm lo inkhelah Stoke City chu 5-0 in an sawp thung.

Merseyside club tan chhuak tur anga sawi thawm awm reng Darwin Nunez chuan theihna a nei sang tih pholangin, Stoke lakah hattrick a siam a, Preston lakah goal khat a khung tawh bawk.

Nunez hi chhuak tur anga sawi ni mah se, tuna zin zingah pawh a tel a, hetihlai hian Uruguayan striker ang thoa chhuak thei dinhmuna ding Federico Chiesa a zin lo thung.

Chiesa hi hliam tenau a neih avanga zin lo a nih thu Reds medical team lam chuan an sawi a, khawthlang media ṭhenkhat chuan a chhuah hnaih vang niin an sawi thung - engmah a chiang lo.