Como-ah Morata a kal dawn

Spain captain Alvaro Morata chuan Serie A club Como a zawm hnai a, Cesc Fabregas enkawl team nen hian inremna an nei vek tawh niin khawthlang media-te chuan an tarlang.

Morata hi Galatasaray tan a khel mek a, mahse, Turkish champion hian Victor Osimhen chu a ngheta an lakluh dawn avangin Spanish striker hi an mamawh tawh lo a, a chhuak dawn.

Kum 32 mi striker hi a nihna takah chuan AC Milan player nghet a la ni - February 2025 khan Milan aṭangin Galatasaray hi loan-in a zawm a, mahse, Turkish club hian a ngheta euro maktaduai 10-a lakluh theihna dan an nei.

Mahse, Osimhen ber an neih dawn chuan Morata kawl tel hi Turkish club tan phurrit a ni thei a, Spain international striker chhuahtir turin harsatna a awm a rinawm loh.

Atletico Madrid leh Real Madrid academy-a awm ṭhin Morata hian Real reserve team aṭangin a professional zinkawng a zawh ṭan a, senior team tan a khelh hnuah Juventus, Chelsea, Atletico, Milan leh Galatasaray tan a khel.

Morata chanchina danglam ve tak chu a club hluiah a kir ngun hle - Real-in an chhuahtir hnuah a kir a, Atletico-ah pawh season hnih loan-a a khelh hnuah, Juve zawm leh tetein, a hnuah loan loin a kir.

Juventus tan pawh hian loan leh loan loin a khel ve ve hman a, Atletico tih lohah chuan champion nomawi a chawi vek bawk! Real tan La Liga (2), Copa del Rey (2), Champions League (2), UEFA Super Cup leh FIFA Club World Cup champion-in, nomawi a chawi kim.

Juventus tan Serie A (2), Coppa Italia (3) leh Supercoppa Italiana-ah a champion a, Chelsea tan FA Cup leh Europa League-ah champion nomawi a chawi bawk.

Morata hian season hman zawh takah khan Milan tan match 25 khel hmanin goal ruk a khung a, assist vawi hnih a nei - Supercoppa Italiana nomawi a chawi hman.

Turkish Super Lig leh Turkish Cup-a a champion pui Galatasaray tan pawh a khel chhe hran lo. Match 16 khel hmanin goal sarih a khung a, assist vawi thum a nei bawk.

International football-ah pawh Morata a duai lo hle. Spain tan match 86 khelin goal 37 a khung a, assist vawi riat a nei. Euro leh Nations League-ah a champion pui a, Euro 2024 champion team-ah phei chuan captain a ni hial.