Maradona number hak a nuam - KDB

Napoli midfielder thar Kevin de Bruyne chuan training-naa Diego Maradona hak ṭhin, jersey number 10 haktir a ni chu nuam a tih thu a sawi a, a tan chuan chawimawina ropui tak ang a nih thu a sawi.

Italian club tana legend mai ni lo, mi tam takin khawvela footballer piang tawh zinga ṭha bera an chhal Diego Maradona hian Napoli tana a khelh lai khan number 10 a ha ṭhin a, kum 1984 - 1991 inkar kha Napoli tan hian khelin, Serie A nomawi pahnih bakah UEFA Cup a lakpui.

Napoli hian an club legend hak ṭhin number hi, tuma hak ve theih tawh loh turin, Maradona chawimawi nan an dah ṭha tawh a, mahse, training-naah KDB chawimawi leh lawm nan, a kawra number 10 inchhu kai chu an haktir.

KDB chuan, "A tirah kha chuan number 10 hi an dah ṭha tawh tih ka hriat avangin mak ka ti deuh a, chutihrual chuan ka tan chuan chawimawina ropui tak a ni. Team leh club-in he chawimawina min hlan hi phu lo ka inti," a ti.

Belgian midfielder hian season ṭan tak tak hunah chuan number 11 a ha dawn. KDB chuan, "Number hian keimahah chuan pressure a nei hran lo a, Maradona chu club legend a ni a, Napoli nen hian an inhmeh em em.

"Chu chu kan hre vek a, mahse, a number ha tlaka min ngaih avangin ka lawm a, ka inchhuang. Kei erawh player dang daih ka ni," a ti a, Napoli-a player ropui lo awm tawhte nena khaikhin a duh loh thu a sawi.

KDB hian City-ah khan season 10 zet a khel a, match 422 khelhsakin goal 108 a khung a, assist 177 a nei bawk. Premier League nomawi paruk bakah FA Cup (2), League Cup (5), Champions League, UEFA Super Cup leh FIFA Club World Cup-ah te champion nomawi a chawi hman. Mahse, nipui lai khan a contract hmang zoin a chhuak.

De Bruyne chuan, "Nipui dangah chuan ka khelhna tur ka chiang sa ṭhin a, tun nipui zet kha chu harsa ka ti hle. Club tam takin min dawr a, a tawpah ka lungdumtu ber Napoli ka thlang ta a ni," a ti.

KDB chuan, "England leh Italy chu a inang lo em em. Mahse, footballer ka la ni reng a, ka theihna sang ber hlan zel ka duh - ka tithei lo nia ka hriat hunah chuan ka la chawl mai ang.

"Tunah erawh kum 34 chauh ka la ni a, theihna sang tak la neiah ka inngai. Chumi pholang tur chuan Napoli hi ka pan a ni," a ti - Pep Guardiola, i lo hria maw?