Laporte-a'n Al Nassr chhuahsan hnai

Manchester City defender hlui, Saudi Pro League club Al Nassr tana khel mek Aymeric Laporte chuan Saudi club hi a chhuahsan dawn nia sawi a ni a, coach thar Jorge Jesus ruahmannaa a tel loh vang a ni.

Laporte hian Saudi club a pan hnuah match 69 khelin goal kua a khung tawh a, Spain tan a la inlan chhunzawm reng bawk. Mahse, coach thar Jesus-a'n duhdan a nei a, Laporte mamawhah a inngai lo.

City tana Premier League nomawi panga ngawt lo chawi tawhtu Laporte hi a club hlui Athletic Bilbao lamah a kir dawn nia sawi a ni a, Spanish club hi a inzirchhuahna academy niin, season ruk a khel hman bawk.

Portuguese coach Jesus hian Laporte thlakna turin Slovakian defender David Hancko a be fel der tawh a, Saudi club hian Feyenoord hnenah pound maktaduai 28 an pe dawn niin khawthlang media-te chuan an tarlang.