US Open beiseitu Draper

Hliam vanga chawl mek Jack Draper chuan US Open khelh theih a beisei, hard court inelna lian hi August 24 aṭangin New York khawpuiah khelh a ni dawn a, a dam hman ngei dawn em tih erawh sawi lawk a harsa.

Kum 23 mi Draper hi hliam vangin a buai a, hard court inelna Toronto leh Cincinnati-a khelh tur aṭangin a inhnukdawk. A ban hliam a dam hman a nih pawhin tun season chhunga Grand Slam hnuhnung ber atan inbuatsaihna a nei mumal dawn lo tihna a ni.

British number 1 Draper chuan, "Wimbledon khelh zawh hnu khan ka ban a hliam a, na tak chu ni hran lo mah se tunah chuan tournament khel turin ka inpeih rih lo, insawiselna nei loa ka inkhelh theih hun nghah a ngai," a ti.

Canadian Open aṭangin Draper chauh hi inhnukdawk a ni lo, ani hma hian Grand Slam vawi 24 champion tawh Novak Djokovic leh Wimbledon champion Jannik Sinner te chuan an tel theih loh tur thu an lo sawi tawh bawk.