Goal khung tam mamawh Mizoram

Junior Boys’ National Football Championship for Dr. B.C. Roy Trophy 2025-26-ah tukin zing dar 8:30 hian Mizoramin Chhattisgarh an hmachhawn dawn a, tlai dar 4:00-ah Maharashtra leh Chandigarh te an inkhel ang.

Amirtsar-a inelna neihah hian Mizoram hi group D-ah Chhattisgarh, Chandigarh leh Maharashtra te nen an awm ho a, match khat ṭheuh an khelh zawh aṭangin coach HC Zarzoliana leh a hote elpui tur a chiang. Group khat aṭangin pakhat chauhin semifinal an lut dawn a, GNDU Sports Complex-ah Mizoram tan goal khung tam a pawimawh dawn.

Mizoram hian match hmasa berah Chandigarh 10-0 in an hneh a, result ṭhaa ngaih a nih laiin Maharashtra-in team ṭha zawka ngaih Chattisgarh chu 10-2 in an sawp. Zara hote hi goal difference-ah goal hnihin ṭha zawk mah se Maharashtra lam hian an lehthal thei tlat.

Mizoram manager Lalbiakzuala chuan, "Maharashtra lam kan la ngaihtuah lo a, Chhattisgarh nena kan inkhel tur hi kan thlir phawt a ngai. Goal khung tam chu kan tum ang a, engpawh thleng se kan kutah engkim a awm. Match hnuhnung pahnih kan chak chuan semifinal kan lut dawn," tiin Santosh Trophy-a Mizoram champion pui tawhtu manager chuan a sawi.

Mizoram leh Maharashtra te hian vawiinah goal khung tam ve ve an tum ang a, an intum hmaa goal difference nei ṭha zawk tan an intawn huna draw a tawk dawn.