Silly Point: Manchester Divided
Thla hnih dawn awh, Test match panga inkhelh series hi chu kan lo thailan tawh angin rilru, taksa leh thlarau zawng zawng hi a nghawng tel a ni ber.
Test a nih ang takin, player ṭhenkhat distinction-a pass chhuak an rawn awm nual ang a, ṭhenkhat erawh hlawhchham lailet der leh an career nghawng an awm bawk ang.
Tin, a tawp thleng zo lo an awm chawk ṭhin a, hei India camp lamah chuan an awm ta nual reng dawn a nih hmel. Thlarau erawh chuan a peih a, taksa erawh a chak lo a ni.
An tlin ta lo
India innghahna vice captain leh wicket keeper ni kawp Rishabh Pant chu Lord's inkhela a kutzung tihhliam a la dam chiang lo a, keeper mawhphurna hlen thei lo tura ngaih niin, bat ngawr ngawr chu a hum theih chuan batsman angin a khelh a rinawm.
Akash Deep-a'n a kap a tihnat avangin a inlan theih hmel loh bawk. Tin, training-na lama khup tina Nitish Kumar Reddy leh ball-in a kutphah a per avanga a kut kak ṭhui ngai Arshadeep Singh te an dam hman hmel tawh loh avangin, ṭhiante aia hmain puanthuah an tel a ngaih hmel ta bawk.
Luhaina tur a tam
1-2 a hnufual mek Hamara Desh tan tun Manchester-a Test vawi lina hi final ang tluk a ni ta a. A hmasa lama kan thailan tawh angin, Old Trafford pitch hi England-a ro ro pawh ball vawm a kawh duhin, swing leh seam che vel a tam bik.
Jasprit Bumrah hi a inlan ngei ngei a ngaih tak hmel riau. Thawk leh khatah India team management tan an bowling line up remkhawm dan tur chu a luhaithlak ta thut a ni ber mai. Inhliam thei reng Bumrah leh tun series a over 100 chuang vawm tawh Md Siraj te bakah tu nge an luh tir ta ang? tih hi a buaithlak lai chu a ni ta.
Ball vawtu lam
Rishabh Pant a inhliam leh bowling all rounder ho inhliam tak nual avangin, chawlhtir tura rin lawk Karnataka batsman Karun Nair pui hi a khelh leh ngei a ngaih hmel ta riau. Ṭum khata players inthlak nasat lutuk hian team 'rhythm' hi a nghawng ve thei tlat si vang a ni.
Vawiin tlai inkhelh ṭan hma thleng hian Shubman Gill leh Gautam Gambhir te putu chu selection chungchangah thuthlukna mumal nei hleithei lo leh insiamrem zung zung thei tura an inkau tawp mai a ngaih hmel.
Manchester to Winchester
England team lam erawh an hrisel ṭha fu a, Lord's Test a kutzung titliak Bashir Ahmed aia spin all rounder Liam Dowson tih loh chu hmel thar kan hmuh hmel lem loh a.
Thlengtu branch England lam hi chak tura rinkai zawk leh a buk rit zawk an ni dawn chiang a, Shubman Gill leh a hote hi kil khata bang lama nekchep an nih tawh hnuah hian, a changtupa hnar thi ang deuhin an rawn che chhuak thei dawn em? tih hi a ni.
Manchester hi India team tan Win-Chester a ni loh vaih chuan, team piah lamah BCCI pawh nasa takin a nghawng dawn. India cricket tan Manchester Divided a nih phah hial te pawh a hlauhawm ta zawk awm e.
