Pakistan coach thar Solano

Newcastle United player hlui Nolberto Solano chuan team enkawl hna a thawk chho a, tunah chuan Pakistan senior team bakah under 23 team enkawl hna a thawk dawn.

Solano hian Stephen Constantine a thlak a, a hna pawimawh hmasa tur chu AFC Under-23 qualifier niin September-ah Cambodia, Iraq leh Oman te nen an inkhel ang.

2027 AFC Asian Cup qualifying khelh laia Pakistan inkhelh hmabak pawh a kaihruai dawn a, October thlaah Afghanistan nen vawi hnih an intum nghal dawn avangin ngaihtuahna a sen nghal char char a ngai dawn a ni.

Thuchhuah siamin Pakistan Football Federation chuan, "President Mohsen Gilani kaihhruaina hnuaiah Nolberto Solano chu kan coach ni turin lawm takin kan lo lawm lut. Premier League, World Cup leh Copa America tawnhriat nei a ni a, Pakistan football tan chuan ani kan nei thei hi lawmna tur a ni," an ti.

Solano hian Peru tan assistant coach hna a lo thawk tawh ṭhin, Qatar World Cup khel tura an tlin loh hnu khan a hna a bansan a, tunah chona thar a hmachhawn dawn a ni.

Solano-a thlak tak Constantine khan kum 2023 October khan World Cup qualifier-ah Pakistan a chakpui a, an chak vawi khatna niin mellung pawimawh an phun. Nikum November khan a contract a tawp a, match khat lek lek atan an rawih belh a, tunah chuan coach nghet an nei leh ta a ni.