Al Qadsiah zawmtu Retegui

Serie A season hman zawh taka goal khung tam ber Mateo Retegui chuan Saudi Pro League club Al Qadsiah a zawm, pound maktaduai 56 man niin kum li chhung cham turin inremna an ziak a ni.

Kum 26 mi Retegui hian season hmasa khan Serie A match 36 a khelh aṭangin goal 25 a khung a, a team Atalanta chu pathumna nih puiin Champions League khel turin an tling.

Mahse, Retegui hian European football inelna sang ber UCL khelh ai chuan Saudi Pro League lama hun hman a thlang zawk, Italy tan match 20 a khelh aṭanga goal ruk kung thei hi Azzurri tan rin zui zel tlak a ni ang em tih erawh sawi lawk theih a ni ta lo thung a ni.

Italian club Atalanta chuan thu chhuah siamin, "Kan tana Mateo hnathawh leh thil tih te kha kan hrereng tawh dawn a, a chuangah kan lawm. A hma hunah hlawhtlinna chang zel turin duhsakna kan hlan," tiin an thlah.

Saudi Pro League season hmasa khan Al-Qadsiah hi palina an ni. An striker Pierre-Emerick Aubameyang chuan Marseille a zawm a, a hmun ruakah Retegui a awm leh dawn ta chiah tihna a ni.

Arsenal, Barcelona leh Chelsea tana khel tawh Pierre-Emerick Aubameyang hi kum 36 mi a ni tawh a, a vanglai a liam tawh - season thar chu Liguee 1 lamah a inlan dawn, nikum khan pahnihna an nih avangin Champions League an khel ang.