Palace-in Europa League khelh an tum

UEFA-in Lyon nen neitu thuhmun an nih avanga Europa League khel thei lo tura an tih Crystal Palace an lungawi lo a, infiamna khawvela thuneitu sang ber Court of Arbitration for Sport (CAS) hnenah an thubuai an thlen.

Palace hian UEFA thutlukna chu ngaihtuah ṭhatsak turin CAS hnenah hian an thlen a, FA Cup champion chuan, "UEFA hnuaia Club Financial Control Body (CFCB) thutlukna min sutsak a, Europa League khelh min phalsak turin kan ngen che u a ni," tiin CAS hnenah an thlen.

UEFA chuan Palace hmun ruakah hian Nottingham Forest chu lut turin an ti tawh - Forest hi league-ah pasarihna an ni a, a dan pangngai ang chuan Europa Conference League khel tur an ni.

Mahse, UEFA-in ECL khel tura Palace an tih takah chuan, league-a pasarihna Forest hi Europa League khel turin an ti ta. Mahse, CAS lamah Palace an tlan luh zui avangin Forest tan pawh an hma hun a la chiang thei lo.

Buaina chu

UEFA danah club pahnih, neitu thuhmun tan an hnuaia inelna pakhatah a inlan dun theih loh! Palace (43%) leh Lyon (77% )-ah hian Eagle Football Holdings chuan share an nei kawp a, he company neitu hi John Textor a ni.

American sumdawng hausa Textor-a'n Lyon leh Palace-ah neitu nihna a neih kawp avangin, UEFA dan ang chuan club pahnih hi inelna inangah an inlan thei lo a, a khawi emaw zawk zawk chu ECL lamah an tlak a ngai.

Club Financial Control Body (CFCB) chuan club pahnih dinhmun hi uluk takin a zirchiang a, Palace zawk chu ECL lamah an paihthla - club pahnihah ngatinge Palace zawk 'kher kher' paihthlak an nih, tih chu zawhna awm thei a ni bawk.

Palace hi FA Cup champion an nih avanga Europa League 'ticket' nei an ni a, Lyon erawh Ligue 1-a parukna an ni thung. UEFA hian dinhmun inangah league lama che ṭha zawk chu Europa League khel turin an ti a, Lyon an vanneih phah - Palace hi season hman zawh takah khan 12-na an ni hram.

An tlai alawm!

UEFA hian Palace hi hrethiam lo tawp erawh an ni bik lo - March 1 thleng kha hun pein, Lyon nen neitu thuhmun hnuaia awm an ni lo, tih lantirna pe turin an hriattir a, mahse, Palace hian an ti hman lo!

Palace hian John Textor chuan club inrelbawlnaah engmah inrawlhna a neih loh thu an sawi a, mahse, UEFA lam chuan hei hi an pawmsak lo a, ECL khel turin Palace hi an tlaktir ta tho.

Mahse, tunah CAS hnenah an kal ta a, Palace chairman Steve Parish chuan UEFA thutlukna chu sut a nih ngei a beisei thu a lo sawi tawh. Parish chuan, "UEFA thutlukna hi thutlukna dik a ni thei lo.

"Phat rual lohin, Textor hi Palace inrelbawlnaah a inrawlh lo tih kan hre bawk. Chu chu thudik tak a ni a, hnial rual a ni lo," a ti a, Eagles chuan Europa League an khelh theih a beisei.

Chance a awm?

Tun hnaia I League champion chiang lo reng pawh, Inter Kashi champion tira chingfeltu, CAS hian August 11 hmain buaina hi an chinfel hman a rinawm a, Palace-in Europa League an khelh dawn leh dawn loh a chiang ang.

John Textor pawhin Palace leh Lyon ten Europa League an khelh ngei theih nan hma a la a, English club-a a share chu pound maktaduai 190-in New York Jets neitu Woody Johnson hnenah hralh a remti tawh.

Mahse, EPL lamin hei hi an pawmsak ve leh phawt a ngai a, UEFA hun tiam chhungin an inchingfel hman lo. Hei mai a ni lo - Textor hi Lyon Chairman a nihna aṭangin a bang bawk a, a theih angin club pahnih tan kawng sah kuaksak a tum.

Mahse, UEFA-in Palace a paihthla ta tho a, tun dinhmuna a lan dan chuan Europa League an khel dawn lo. Mahse, CAS-in Palace vuivaina a ngaithla ang a, Textor-a hmalak dan thlirin, chance erawh an la nei tho.

A nasa asin

Palace hian kum 1999 khan UEFA Intertoto Cup third round an khel a, Turkish club Samsunspor chu aggregate-a 4-0 a ngam loin, an tla nghal a, Europe-a an inlan ve chhunah an ropui lo hle.

Kum tam tak hnuah European football khelhna chance an awm a, tunah UEFA dan avangin khel lo thei dinhmunah an ding mek - kar hmasa khan Palace fan-te chuan UEFA thutlukna duh lohna an lo lantir tawh a, an club khelmual Selhurst Park-ah pungkhawmin, na takin UEFA an sawisel.

Palace-a a share hralhtu Textor pawhin, "UEFA thutlukna hian min barakhaih hle. UEFA beisei angin a theih ang angin hma kan la a, March 1 hma fe khan club hralh tura inbiakna a kal tawh a, Europa League draw neih hmain kan inhralh fel hman dawn bawk.

"Palace-in an beisei ram an thlen theih nan, ka club hmangaih em em chu ka hralh phah a, heti mai hian thutlukna siam a ni leh lawi si," tiin UEFA demna a lo sawi tawh bawk.

Hre reng la...

CAS tan thutlukna siam fimkhur a ngai dawn - season hmasa khan UEFA chuan neitu thuhmun ni siin, club pali chu Europe-a inelna inanga lan an lo phalsak tawh a, hei hi Palace hian an theihnghilh bik lo ang.

Season hmasa khan Champions League-ah club neitu thuhmun, Manchester City leh Girona te chu a rualin inlan an remtihsak a, Manchester United-ah Nice neitu Jim Ratcliffe-a'n share nei mah se, Europa League-a inlan an phalsak ve ve bawk - thla 18 chhung club inkarah transfer awm an phal lo thung.

Mahse, UEFA chuan club palite hian an dan zawmin, management thutlukna, inrelbawlna leh thil dang dangah a hrangin club-te hi an kal vek a, club neitute club pahnih inrelbawlnaah an inrawlh lo niin an sawi.

Hei tak hi Palace-in CAS-ah pawh an ṭan chhan nghet tur a ni thei ang - tun season-ah hian Palace bakah Irish club Drogheda United leh FC DAC 1904 Dunajská Streda pawh ECL khel tur an nih laiin an club neituten ECL-a inlan tur dang club-ah share an neih avangin ECL aṭangin paihchhuah an ni.