Brentford-in Newcastle an hnar

Champions League khel tur Newcastle United chuan Brentford striker Yoane Wissa lakluh an tum a, mahse, pound maktaduai 25-a an dawrna chu Brentford hian an lo hnar.

Mahse, Magpies hian Wissa hi lakluh tuma dawr zui erawh an la tum tho a, mimal thilah chuan harsa awm lo tura ngaih niin, club pahnih indawrna hi a pawimawh ber tur a ni ang.

Wissa pawh hi Brentford-in pre-season training camp an neihna Portugal aṭangin England lamah a kir a, Brentford thuneitute nen hmaichhanah a hma hun chungchang an sawi dawn.

Brentford hian Wissa hi an hralh dawn a nih chuan £50mtd aia tlawma hralh an tum lo nia sawi a ni a, Manchester United laka Bryan Mbeumo an chân bawk avangin, an phalna zata dawr an nih loh chuan hralh loh pawh an pawi ti lo ang.

Wissa hian Brentford-ah hian kum khat khel turin contract a la nei a, kum khat dang pawhsei theihna dan a la tel bawk.

Kum 28 mi Wissa hi Nottingham Forest pawhin lakluh tumin an dawr tawh a, Magpies an inrawlh chuan an chan a rinawm loh thung. French forward hian August 2021 khan Lorient aṭangin Brentford hi a zawm a, 2023-24 season thleng kha chuan striker a la ni lo.

Mahse, attacking midfielder anga khel ṭhin Wissa hi Ivan Toney-a'n Brentford chhuahsan a, Saudi Pro League a pan hnuah striker anga chhawr a ni a, season hman zawh takah khan match 39 khela goal 20 khungin, assist vawi nga a nei.

Wissa rimtu Newcastle hian Nottingham Forest aṭangin Anthony Elanga chu pound maktaduai 55-in an la lut tawh bawk a, Champions League khel turin an inthuam chak zel.