Real-ah Courtois a cham dawn

Thibaut Courtois-a'n Real chhuahsan mai a la tum lo. Belgian keeper ṭha mi hian season hnih dang khel turin contract thar a ziak a, kum 2027 thleng Santiago Bernabeu-ah a khel dawn.

Kum 33 mi goalkeeper hian kum 2026 thleng Real-ah hian contract a nei a, a contract neih lai thai chhiain, kum hnih atan contract thar a ziak leh ta a ni.

Courtois hian kar khatah £241,227 a hlawh mek a, a hlawh hi tihpun niin, a punna zat erawh a hriat theih rih lo. Real hian defender Raul Asencio chu kum 2031 thleng an hnena khel turin contract thar an lo pe tawh bawk.

Chelsea leh Atletico Madrid tan pawha khel tawh Courtois hian kum 2018 khan Real hi a zawm a, match 288 a inlansak tawhah vawi 113 zet goal chhuah loh a nei a, La Liga nomawi pathum leh Champions League nomawi pahnih a chawipui tawh.

Courtois hian August 2023 khan ACL hliam neiin, hemi hnu hian ngai a awh loa ngaitu an tam hle - a bik takin Copa del Rey 2025 final-a a chesual chuan sawi a hlawh a, Real hian an thlak mai ringtu an tam hman.

Mahse, Club World Cup khelh zawh takah Courtois hian keeper ṭha mi a nihna a pholang a, semifinal an luh theih nan a thawhhlawk hle - tunah chuan hlawh tipungin, contract thar a ziak leh ta zawk.