Xhaka-a'n Sunderland zawm a duh

Bayer Leverkusen midfielder Granit Xhaka chuan Bundesliga club hi chhuah a duh thu a hrilh a, Premier League kai thar Sunderland zawm a duh - club pahnih an indawr mek.

Swiss midfielder hi Saudi Pro League nen pawh sawi zawm a ni hman a, mahse, kum 32 mi hian Premier League-ah kir a duh - Black Cats nen hian mimal thilah an inrem tawh.

Xhaka hian a contract ang chuan kum 2028 thleng Leverkusen-a chamna hun a nei a, season hnih a khel hman - a season hmasa zawkah Bundesliga leh DFB-Pokal ah champion nomawi a chawipui a, player thawhhlawk a ni.

Hetiang boruak karah hian Leverkusen boss thar Erik ten Hag-a'n boruak a lo nei ve a, Xhaka an hralh loh tur thu a sawi! Dutch coach chuan, "Xhaka agent chuan a duh duh lo sawi rawh se.

"Mahse, kan player pawimawh pathum kan chhuah tawh a, a theih tawh loh. Xhaka hi kan chhuahtir leh a nih chuan, kan club inruahmanna a tibuai vek ang," a ti - Inter Milan pawhin Xhaka hi an duh nia sawi a ni.

Manchester United coach hlui chuan sawi zawmin, "Thil chiang tak chu Granit hi hruaitu ṭha a ni a, kum nga atana contract a ziahah kum thum dang a la nei bawk - chhuahtir mai tur chuan kan tan a ṭangkai lutuk," a ti a, chhuahtir a tum lo.

Leverkusen hian Florian Wirtz leh Jeremie Frimpong chu Liverpool hnenah hralhin, Jonathan Tah chuan Bayern Munich a zawm bawk a, Xabi Alonso hnuaia league nomawi an chawi theih nana player thawhhlawk vek an ni.

Xhaka hian Leverkusen a zawm hma hian Arsenal-ah kum sarih a khel hman a, match 297-ah goal 23 leh assist 29 neiin, English football-ah a mikhual lo - Leverkusen tan match 99 a khel hman a, goal ruk khungin, assist vawi kua a nei thung.