Messi leh Alba te an chiang lo

Major League Soccer (MLS) kla dan phungah chuan MLS All-Star Game a awm ṭhin, player ṭha leh lar zual inelnaah hian Lionel Messi leh a teammate Jordi Alba te chu tel tura thlan an ni a, mahse training an zawm ve lo.

Messi leh Alba te hian training an zawm loh chhan hi chiang taka sawi an nei lem lo, chhuanlam ṭha tawk tak ni lo vanga an khel lo a nih chuan league match pangngai khel thei lo tura hrem theih an ni dawn.

Paris Saint Germain aṭanga Inter Miami zawmtu Messi hian season hnih chhung chu MLS All-Star Game a khel lo, season hnuhnung pahnihah hi chuan hliam vanga inkhel thei lo a ni, tun ṭumah erawh hliam leh harsatna a nei lo.

Austin FC leh MLS All-Star manager ni bawk Nico Estevez chuan, "Leo chungchangah zawhna ka dawng tam hle, kei chuan chhanna chiang tak pek theih ka nei lo. Player enkawl tur pek ka ni a, training tura lo kalte ṭha taka lo enkawl kha ka hna a ni.

"Theih ni se la chuan khawvela player ṭha bik enkawl chu ka duh a, mipui hmuh turin match hmuhnawm bik chhawp chhuah ngei pawh thil chakawm tak a ni, chutiang chu a thlen ngei pawh ka beisei," tiin a sawi.

MLS All-Star Game hi tukinah hian khelh a ni dawn a, Messi leh Alba te hi an tel dawn nge tel dawn lo tih chu nimin tlai thleng khan thu chiang a la awm lo a ni.