England hmeichhe team-in final an thleng

UEFA Women's Euro 2025-ah England chuan Thawhlehni zan khan semifinal-ah Italy lehthalin 2-1 in hnehna an chang. Lionesses hi champion lai an ni a, nomawi humhim thei dinhmunah an ding.

Hmeichhe Euro hi Switzerland-ah July 2, Nilaini aṭang khan khelh ṭan a ni a, England hian nizana Germany leh Spain inkhela chak zawk zawk nen nomawi an inchuh ang. Final hi July 27, Pathianni zan dar 9:30 hian St. Jakob-Park, Basel-ah khelh a ni ang.

Bul ṭan ṭha Italy

England hian semifinal lut turin quarterfinal-ah Sweden chu 2-0 a an hnufual hnuah siphurh an sut a, hun pangngaiah 2-2 niin penalty shootout-ah 3-2 in an chak. Penalty hi mi pasarihin an pet hman a, a chak zawk England-ah pawh pet goal aiin pet goal lo an tam zawk.

Mumang ramah Sarina Wiegman hote a cheng a, thawnthu ziak thiam bikin thawnthu uluk taka a ziah ang thoin semifinal-ah pawh thil a thleng. England chu chak tura duan ang mai an ni a, Sweden laka an vanneih ang thoin Italy lakah pawh an vannei.

Stade de Geneve, Geneva-a entu 26,539 hmaah team pahnihin inkhel nung ṭha tak an lantir a, Italy-in minute 33-naah Barbara Bonansea hmangin an khung a, goal ṭha a ni. England-in siphurh sut tumin nawr mah se Italy goalkeeper Laura Giuliani an paltlang thei lo.

Comeback

England-in nawr let na a, first half-a siphurh an sut theih loh hnuah second half-ah an nawr na lehzual. Mahse, second half-ah hian England aiin Italy-in chance ṭha an nei hmasa zawk a, goalkeeper Hannah Hampton zarah England-in beiseina an nei zel.

Mahse, minute 90 a nih hnuah pawh England-in goal an khung thei lo. Injury time minute sarih pek belh a ni a, England an vannei ta chiah. Hun pek belh minute nganaah goalkeeper Giuliani-i'n cross ball a ti per a, substitute Michelle Agyemang-i'n a per chu goal-ah a chantir a, 1-1 in inkhel a tawp.

Extra time khelh a ni a, England-in an nawr na zawk. Minute 117-naah Agyemang-i'n crossbar a tih per a, England-in nawr chhunzawm zelin cross ball hlauhawm pawh ni loah box chhungah Italy midfielder Emma Severini-i'n England striker Beth Mead a pawtthlu a, referee-in penalty a pe.

Subsitute Chloe Kelly rawn pen chhuakin a penalty pet hi keeper Giuliani-i'n dang mah se a per hi Kelly hian a khung ta tho. Inkhela chungnung zawk England an vannei a, 2-1 in hnehna an chang.