Buenos Aires-ah MotoGP an tlan dawn

Argentine Grand Prix chuan kum 2027 aṭangin tlanna thar an nei dawn - MotoGP thuneitute chuan bike intlansiakna sang ber hi Buenos Aires-ah tlan a nih tur thu an sawi.

Kuminah Argentina Grand Prix hi Autodromo Termas De Rio Hondo, Termas De Rio Hond-ah tlan a ni a, kum 2027 aṭang chuan Autodromo Oscar y Juan Galvez, Buenos Aires-ah an tlan tawh ang.

Thuchhuah siamin MotoGP chuan, "Tun hma lama tlankawng hlun leh hriat hlawh tak Autodromo Oscar y Juan Gálvez chu cheiṭhat vek a ni a, bike intlansiakna sang leh ngaihhlut hlawh ber thleng turin a ṭha tawk hle.

"He tlankawngah hian kum 1960, 1980 leh 1990 bawr khan bike inelna sang hi tlan a lo ni tawh ṭhin a, khawvela rider ṭha leh ropui ber ber te hmun hlun tawh tak maia an kir leh thei tur hi a lawmawm," an ti.

Kumin Argentina GP-ah khan Marc Marquez chu a tlan chak ber - Ducati rider Marquez hian championship-ah pawh hma a hruai mek a, champion turin a dinhmun pawh a ṭha leh tawh hle a ni.