Goal kua khung thei Mizoram dinhmun a ṭha
Junior Boys’ National Football Championship for Dr. B.C. Roy Trophy 2025-26-ah Mizoramin Chandigarh 10-0 a an sawp hnuin nimin khan Chhattisgarh 9-0 in an sawp leh a, semifinal lut turin an dinhmun a ṭha. HC Zarzoliana hote hi group D-ah Maharashtra, Chandigarh leh Chhattisgarh te nen an awm ho a, group-a pakhatna chauhin semifinal an lut dawn.
Nimin inkhel hnuhnung zawkah Maharashtra-in Chandigarh 3-0 a hnehin Mizoram nen point ruk ve ve hmu mah se Zara hote goal difference an ṭhat zawk avangin an dinhmun a ṭha zawk. Mizoram leh Maharashtra te hi July 25, Zirtawpni tlai dar 4:00-ah an inkhel dawn a, semifinal lut turin Mizoram tan draw a tawk ang.
Player siksawi hret
GNDU Sports Complex-ah Mizoramin Chattisgarh an hmachhawn a, he lai hmun hi Mizoram senior team-in kum 2023-a Santosh Trophy qualifier an khelhna hmun a ni.
Mizoram coach Zara'n player a siksawi hret a, goalkeeper Vanlalrindika'n bul ṭan nawnin outfield player pathum a thlak. Zoramthara, Jedida Vanlalrinchhana, Enok Lalchelzing, Lalrempuia, Malsawmkima, Joel Lalremruata leh Malsawmdawngkima ten bul an ṭan nawn.
Omega Lalawmpuia Ralte, R. Lalremruata leh Solomon Lalramsanga te hahdamna hun pein an aiah Lalthlamuanpuia, Victor Vanlalmalsawmdawngzela leh Lalawmpuia te an lut thung.
Goal kua chu
Mizoramin goal khung tumin ṭan phat aṭangin an nawr nghal a, minute 12-na lekah corner kick hmang ṭangkaiin Joel Lalremruata hmangin an khung. Joel hian corner aṭanga ball lo per chhuak chu vawi khatah petin goal-ah a lut.
A khat mawi tawkin goal a lut zui a, Lallawmpuia'n hnai zet aṭangin minute 18-naah chiang zetin a pet lut. Minute 40-naah goal thumna a lut a, Mizoramin corner kick hmang ṭangkaiin Joel-a'n a khung.
Minute 44-naah Victor-a thawhrah sengin vei lam aṭanga a cross luh chu Malsawmdawngkima'n a khung. First half-ah 4-0 a ni tawh a, second half-ah goal tam zawk a beisei ngam.
Minute 50-naah Enok Lalchelzing-a'n mual ding lam aṭangin goal lam panin a la lut a, Chattisgarh defender leh keeper ten an dang thei lo - Mizoram goal ngana a khung.
Victor-a'n minute 57-naah a khung a, goal luh theih nan Joel-a ball cross a ṭha hle. Corner kick-ah Mizoram an ṭha a, minute 73-naah Joel-a vawrhluh chu S Lalremsiama'n a tauh lut.
Goal khung tam a pawimawhna hriain Mizoramin injury time-ah pawh na takin an nawr a, Malsawmdawngkima'n goal riatna a khung. Injury time minute thumnaah S. Lalrempuia'n box pawn aṭangin kawh zetin a khung a, Mizoram 9-0 in an chak.
Viraj Arora hattrick
Mizoramin goal chhuah loin goal 19 ngawt an khung a, Maharashtra tan goal difference-a Mizoram chunga awm turin goal 11-a Chandigarh an hneh a ngai. Maharashtra hian Chattisgarh 10-2 a an hneh tawh avangin goal 11 pawh khung se thil mak tur niin a lang lo.
Mahse, Maharashtra hian goal khung an harsat tlat. Chattisgarh laka goal ruk ngawt khungtu Viraj Arora-a'n first half-ah Maharashtra tan goal awmchhun a khung a, second half-ah goal hnih dang khungin hattrick a siam. Maharashtra 3-0 in an chak a, tun inelnaa goal kua khung tawhtu Viraj Arora hi Mizoram tan pawh ven uluk a ṭul ang.
Mizoram an lawm
Mizoram manager Lalbiakzuala chuan, "Kan naute an khel ṭha a, goal chhuah loin goal kua ngawt kan khung a, a lawmawm. Semifinal lut turin Maharashtra kan la hmachhawn dawn a, draw chauh tawk mah se chak ngei theih kan inring," tiin Vanglaini a hrilh.
Kulikawn pa Biaka chuan sawi chhunzawmin, "Amirtsar-a Missionary-a awm Lalsangliana leh a nupui Papari ten min rawn ṭawiawm a, kan lawm hle. Anni hian player-te thawmhnaw zawng zawng min suk sak dawn a, an inpekna avang hian kan lawm takzet a ni," tiin a sawi.
Thlirna Tawi
Group D : Mizoram, Chhattisgarh, Chandigarh leh Maharashtra
July 21, Thawhṭanni
Mizoram 10 - 0 Chandigarh
MIZ : R Lalremruata 22', 48'; Joel Lalremruata 23'; Omega Lalawmpuia Ralte 28'; Lalrempuia 39'; Malsawmdawngkima 40'; Enok Lalchelzing 55', 74'; Zoramdinthara 56'; Lallawmpuia 66'
Chattisgarh 2 - 10 Maharashtra
CHA : Y Mohit 2'; Mitthuram Poyam 59'
MAH : Erwyn Basil D'souza 6'; Viraj Arora 4', 17', 43', 80', 85', 90+2'; Md Arshid Khan 24' (OG); Adavet Deepak Salunkhe 40'; Aaryak N Jadhav 52'
July 23, Nilaini
Mizoram 9 - 0 Chhattisgarh
MIZ : Joel Lalremruata 12', 40'; Lallawmpuia 18'; Malsawmdawngkima 44', 90+1'; Enok Lalchelzing 50'; Victor Vanlalmalsawmdawngzela 57'; S Lalremsiama 73'; Lalrempuia 90+3'
Maharashtra 3 - 0 Chandigarh
MAH : Viraj Arora 44', 70', 90'
July 25, Zirtawpni
Chandigarh 8:30 AM Chhattisgarh
Maharashtra 4:00 PM Mizoram