Argentina chunga leng Neymar leh Brazil
Neymar-a'n a hmangaih Brazil tan goal 50 a khung tling ta. World champion vawi nga ni tawh Brazil chuan nimin zing khan an mikhual Argentina 3-0 a hnehin 2018 FIFA World Cup South American qualifying hmahruaitu an nih chhunzawm zel.
Tite kaihhruaina hnuaiah Brazil hian a zawnin match nga chhung hnehna an chang ta a, point 24 an hmu tawh. Lionel Messi lo kir mah se Argentina-in result ṭha an neih theih loh vangin point 16 chiah an la nei a, paruknaah an awm.
South America ram 10 aṭangin a sang pali chu Russia kal turin an tling chiang nghal dawn a, panganain Oceania hnuaia pakhatna nen playoff an khelh a ngaih avangin world champion vawi hnih ni tawh Argentina dinhmun a ṭha rih lo.
Brazil an vul
Belo Horizonte-ah World Cup 2014 semifinal khelh niin a thlengtu Brazil chu Germany lakah 7-1 in an mualpho, an ram mipui an ṭap a, mittui a luang. Kum hnih liam taa an ṭahna hmunah Argentina an mikhual leh a, lungngaihna mittui kha lawmna mittuiin a thlak thleng.
FIFA ranking-a pakhatna Argentina tan Messi a lo kir bakah Angel Di Maria leh Gonazalo Higuain ten inkhel bul an ṭan a, minute khatna lekah Brazil midfielder Fernandinho chuan Messi a tihtluk avangin yellow card a chawi nghal - ram inel pahnih inkhel boruak a nung nghal.
Brazil tan minute 25-naah Philippe Coutinho a inlar a, Liverpool mid-fielder hian ball ṭha taka a tlan pui hnuah tun hma lama a lo tih fo tawh angin yard 20-a hla aṭangin goal hmahruai a thlawh lut - Argentina keeper Sergio Romero tan dan ngaihna a awm lo a, Javier Mascherano-a'n a tih tur a tih tawk loh vangah a ngaih theih bawk.
Goal an khung hnuah Brazil an hawi kir tawh lo. Barcelona star Neymar-a'n club lama a teammate Mascherano a tlan pel hnuah goal ban a pet per. Neymar vek hian Argentina defender Nicolas Otamendi leh Pablo Zabaleta te ven hman loin an goal hnihna a khung a, second half ṭan tirah Paulinho chuan an chak nemnghehna goal a khung bawk.
Fak tlak Neymar
Kum 24-a upa Neymar hian Brazil tan match 74 a khelh
aṭangin goal 50 a khung tling ta a, football thiam leh sulhnu nei
ṭha Brazil tana goal khung hnem palina a ni der tawh. Brazil tana goal khung hnem ber chu 'King of Football' tia hming lem an vuah Pele niin goal 77 a khung.
Mogi das Cruzes, Brazil-a piang Neymar hi theihna nei sang bik nei a nih avangin kum 18 mi chauh a nih lai
aṭangin Brazil tan a khel phak der tawh. 2015 Copa America-ah khan captain Thiago Silva chu hliam vanga a inlan theih loh avangin coach Dunga chuan Neymar hi captain atan a ruat a, tun thlengin a ni chhunzawm.
Neymar hian Olympic gold medal dawn a duh avangin Copa America Centenario-ah a inlan lo a, August thla khan Rio Olympic-ah an ram chu champion puiin an ram chanchina a vawi khat nan mipa football-ah Brazil chuan gold medal an awrh nge nghe a ni. A kum a la tam lo a, football-ah eng ang sulhnu ropui chiah nge a hnutchhiah dawn tih chu hunin a la hril ang.
Eng nge an sawi?
Argentina captain Messi chuan, "Hetiang result hi kan beisei leh duh a ni ngai lo. Team-ah thil ṭha lo a lo thleng a nih chuan a siamṭhat hna kan thawk tur a ni a, kan zavaiin mawhphurhna kan nei. Kan zavaiin World Cup khelh kan duh vek a, chumi tur chuan tunah hian inpumkhat taka kan thawhho a pawimawh," tiin a sawi.
Brazil coach Tite chuan, "Match nga ka enkawl tawhah hnehna kan chang vek a, hei chu ka beisei ngam loh khawpa ṭha a ni. Argentina kan hneh takah chuan ka nauten inrintawkna an neih belh nasa dawn tih a chiang. Ka naute khelh danah khan ka lawm a, Brazil jersey an ha a nih chuan an theihna sang ber an hlan tur a ni. Chutihrualin hmasawnna tur kan la nei a, hmalam panin kan kal zel ang," tiin a sawi.
Inkhel dang
Uruguay chuan Sebastian Coates leh Diego Rolan te goal khung hmangin Ecuador 2-1 in an hneh a, a zawnin match li chhung chak loh an nei ta lo - point 23 hmuin hmahruaitu Brazil hnuai chiahah an awm chhunzawm zel.
A zawna Copa America nomawi vawi hnih chawi thei Chile erawhin point thum an hlawh chhuak zo lo a, an mikhualna ramah Colombia nen goal awm loin an inhnehtawk. Inkhel dangah Peru leh Venezuela ten hnehna an chang ve bawk.