UN nena thawk dun leh tur Sharapova

Ningani khan United Nations chuan thuchhuah siamin Maria Sharapova chuan hremna a hman zawh hunah UN goodwill ambassador a nih leh theih tur thu an sawi chhuak.

UN chuan March thla khan Sharapova hi hrem a nih avangin goodwill ambassador a nihna chu an lo tih tawp lailawk sak tawh. Russian star Sharapova hi International Tennis Federation chuan kum hnih chhung atan hrem mah se infiamna lama thubai ngaihtuahtu sang ber Court of Arbitration for Sport lamin thla 15 chhung atan an tih tawi sak a, nakkum April thla-ah hremna a hmang zo ang.

Thuchhuah siamin UN chuan, "Maria Sharapova-i'n hun rei lote hnuah tennis a khel thei leh dawn tih kan hriat khan kan lawm a, goodwill ambassador a nihna kan tihtawp sak hi kan chhunzawm leh thei ang. A dinhmun kan hriatthiam pui a, hremna a zawh hunah a chanvo turte tifel turin inbiakna kan neih pui ang," an ti.

Forbes-in khawvel hmeichhe infiammi zinga sum lalut hnem ber dawta an puan Sharapova hi in-fiammite tana hman phal loh meldonium a hmang tih hmuh chhuah a nih avangin hrem mek a ni.