Donald Trump Infiamna khawvelah nghawng a nei dawn em?

Nilaini khan khawvel rin loh zawk Donald Trump chu Hillary Clinton hnehin United States of America president atan thlan tlin a ni a, politics khawvela a hmel vawi khat lannaa US president ni nghal thei hian infiamna khawvelah pawh nghawng a nei nghal.

Donald Trump-a tlinna avang hian 2024 Olympic thlen tum USA dinhmun a ṭha lo nghal nia sawi a ni a, FIFA eirukna chhui mek kalzel dan turah kum 70-a upa pa rorum hian eng angin nge thawm a neih dawn? tihte, FIFA World Cup 2026 US-in thlen a tumna kawngah ram dang thlawpna a hmuh ṭhat loh phah mai ang em? tihte leh khawvel huapa American football, baseball leh basketball ṭhanna kawngah eng angin nge nghawng a neih ang? tihte chu infiamna khawvelin a hriat châk a ni.

Olympic nghawng

International Olympic Com-mittee (IOC) chuan kum 2024 summer Olympic thlengtu tur nakkum September khian Peru khawpuia Lima-ah vote hmanga thlanna an nei dawn a, US khawpui langsar Los Angeles leh Hungary khawpui Budapest chu inel tur an ni.

August thla khan Democratic party mi leh sa, Hillary Clinton thlawptu LA mayor Eric Garcetti chuan Trump-a chungchangah IOC chuan ngaihdan nghet tak an neih thu sawiin, "Trump hi president ni ta se chuan IOC hotute chuan ngaihdan dang daih an nei nghal ang, ṭawngkam hlauhawm leh hriam tak tak kaihhruaina hnuaia awm ramah engtinnge khawvel remna puala infiamna hi kan nghah theih ang? tih hi an thinlungah zawhna a awm nghal thei a ni," a ti.

IOC president Thomas Bach chuan, "He khawvela mi ṭhen-khat chuan engkim chunga thuneituah an inngai a ni," tiin a lo sawi tawh a, US-a Muslim pemkhawm leh phalna loa pemkhawmte a hnawhchhuah vek tur thu sawitu Trump-a thusawi a chhanletnaah ngaih a nih avangin Olympic thleng turin Los Angeles dinhmun a ṭha lo hle.

World Cup nghawng

Football khawvela thuneitu sang ber FIFA chuan Russia-in 2018 World Cup a thlen dawn vang leh Qatar-in 2022-a a thlen dawn avangin 2026 World Cup thlengtu tur chu Europe leh Asia khawmualpui pawn lam ram an nih tur thu an lo sawi tawh a, hming langsar ber ni nghal chu USA a ni.

North America khawmualpui football thuneitu sang ber CONCACAF hotupa Victor Montagliani chuan USA malkhai ai chuan US/Mexico/Canada te inthlen ṭawm chu uluk taka a ngaihtuah thu a sawi a. Mahse, a campaign au hlaa ramri chungchang nasa taka sawitu Trump-a sorkar hnuaia Football Association hi Mexico leh Canada hian an thawhpui duh meuh ang em? tih chu zawhna awm thei tak a ni nghal.

Trump hian Mexico nena an inrinaah dan loa lut ru te an dan theihna turin ramri zawng zawng hung chhuah vek a nih tur thu a sawi a, hetianga US-a luh ruk ching te chu 'mi tlaktlai lo' tiin na takin a lo sawisel tawh bawk. Hetiang taka ṭawngkam lo nei tawh sorkar hi Mexico hian an thawhpui duh kherin a rinawm loh.

World Cup thleng tur chuan sorkar aṭanga sum leh pai thlenga thlawpna ṭha tak hmuh a ngai a, inthlen ṭawm dawn chuan ram inthlen ṭawm tur sorkarte an thawhho ṭhat a ngai viau bawk - hei hi US leh Mexico tan chuan thil harsa tur nia ngaih a ni a, "Min thawhpui duh ram chu kan thawhpui vek ang," tiin Trump-a'n thlan tlin a nih ṭumin sawi mah se Mexico tel lohna US/Canada 2026 World Cup hmuh hi beiseiawm zawk chu a ni a, US hi a tel lo zawk thei bawk.

Sumdawnna

Khawvel hmun danga lar tak ni lem lo American hoin an buaipui em em chu American football an tih National Football League a ni. NFL bakah hian National Basketball Association leh Major League Baseball ten US-ah ngaihven an hlawh a, heng infiamna langsarte hian an sumdawnna huang zauha US pawn lam thleng dap tumin hma an la mek. Heng league te hian an infiamna lar zawk nan London, Barcelona, Rio de Janeiro, Mexico City, Shanghai leh Berlin-ah te match an khel tawh a, mah se Trump-a tlinna hi an hmasawnna daltu a ni thei dawn.

Trump hian a campaign au hla zingah ram pawn aṭanga sum lut leh an thil chawk luh reng rengah chhiah tam zawk an lak tur thu a sawi a, a sawi ang hi a thleng dawn a nih chuan ram pawn sum tam zawk lakluh tuma hma la mek NFL, NBA leh MLB te tan chuan buaina a ni thei dawn a, television rights leh thil dang tam tak a ken telah chhiah a pung dawn tihna a ni a, hei hian an fehchhuahna tur ram a nghawng loh theih dawn loh avangin ram pawn lam khawpui ten an infiamna an thleng duh kher lo mai thei. Economist lar te chuan Trump-a ruahmanna hian ram leh ram insum dawn tawnnaah buaina a thlen theih thu an sawi.

FIFA buaina

US Department of Justice chuan May 2015 khan eirukna avanga hmingchhia FIFA hruaitu engemawzat chu thubuai a siam-sak a, Trump-a lal takah chuan American sumdawng hausa tawn-taw hian FIFA buaina hi a ngai-pawimawh chhunzawm zel thei ang em? tih chu zawhna awm a ni.

New York mayor hlui Rudy Giuliani chu attorney general nilai Loretta Lynch thlak tura beisei a ni a, kum 1980 chhoa Mafia ho a beihna avanga hmingthang Giuliani hian eirukna avanga football ti hminghliautu te lakah eng angin nge hma a lak dawn? tih hi khawvel hmuh châk leh hriat châk a ni.