World Cup qualifier Spain leh Portugal inlan dawn

Zanin hian Europe ram ten World Cup qualifier an khel leh dawn. Group B hmahruaitu Spain chuan dar 1:15-ah point la hmu lo FYR Macedonia an lo mikhual ang. Pathianni zanah Euro 2016 nomawi chawitu Portugal chuan Latvia an mikhual ve bawk dawn a ni.

Costa tel loin

Premier League goal khung hnem ber ni mek Diego Costa chu training-na lamah a ṭhâl a tih nat avangin a inlan dawn lo. Chelsea striker aiawh tur hian Iago Aspas chu koh a ni. Kum 29-a upa Celta Vigo striker Aspas hi a inlan a nih chuan Spain tana a match hmasa ber a khel dawn tihna a ni ang.

Julen Lopetegui-a kaihhruai Spain hian match thum an khelh tawhah chak loh an la nei lo a, point sarih hmuin hmahruaitu an ni. Hetih lai hian an khingpui tur Macedonia erawhin point an la hmu lo a, Spain tan hma-hruaina sawhnghehna hun ṭha a ni.

Spain hian inhliam vangin player pawimawh an chhawr thei lo nual dawn, striker Costa bakah hian captain Sergio Ramos, Andres Iniesta, Gerard Pique, Jordi Alba leh Javi Martinez te chu hliam vangin an chawk vek.

Kum 50-a upa Lopetegui chuan, "Ka player zingah hlam vanga inlan thei lo tur an awm nual a, chutih rualin player
ṭhenkhat tan inlanna hun ṭha a ni thung. Inhliam ngah mah ila ṭha taka khel tura kan inrem khawm theih ka beisei a, kei mahni rama khel tur kan nih bawk avangin kan zam lo," tiin a sawi.

Ram pahnihte hi tum hma lamin vawi nga an inhma-chhawn tawh a, heng zinga match khat chu friendly match niin a dang pali chu Euro qualifiers-ah a ni thung - hengah hian Spain an chak vek. An intawn tawhnaah hian Spain hian goal 14 khungin goal thum chiah an la chhuah bawk, zaninah pawh chak zawk ngei tura rinkai an ni.

Goal khung thiam Portugal

Cristiano Ronaldo telna Portugal-in Euro 2016 nomawi chawi turin a thlengtu France chu Eder-a goal khat hmangin an hneh a, hun hlimawm an hmang. Fernando Santos-a naute hian beiseina sang tak nen World Cup qualifier khel zui mah se an match hmasa berah Swit-zerland 2-0 in an ngam lo nghal.

Amaherawhchu, Real Ma-drid star Ronaldo a inlan hnuah Portugal an talbuai chhunzawm lo. Andorra leh Faroe Island te chu 6-0 ve ve in an sawp zui a, match thum khelh aṭanga point ruk hmuin Group B-ah pahnihna an ni mek - Swiss an phak lohna chu point thum a ni.

Portugal hian Pathinni zan dar 1:15-a an mikhual tur Latvia tunhma lamin lakah hnuhma an lo nei ṭha hle. Vawi li an an hmachhawn tawhah hnehna an chang vek a, an inkhelh apiangin goal hnih an khung tlin ziah bakah an intawn hnuhnung pahnihah goal an chhuah lo bawk.