Lukaku dahsangtu Koeman

Everton manager Ronald Koeman chuan a striker Romelu Lukaku chu khawvela a ṭha berte zinga mi a nih theih thu leh Barcelona tan pawha khel tlak khawpa theihna nei sang a nih thu a sawi chhuak.

Belgium international Lukaku hian Chelsea
aṭangin kum 2013 khan Toffees hi loan hmangin a zawm a, kum 2014 July thla khan club record ni turin pound maktaduai 28-in a nghetin an lalut. Everton tan hian match 137 a khelh aṭangin goal 68 a khung der tawh.

Koeman chuan, "Romelu hian a hun tawp thleng Everton tan a khel a nih chuan hmabak hlen loh a nei ang. A theihna sanzia ngaihtuahin he club thlen chin aia sang thleng thei hi a ni," a ti. Tun season Premier League kal mekah Everton hian goal 15 an khung tawh a, heng zinga goal sarih chu Lukaku khung a ni.

Dutch manager chuan a striker duhlai leh Holland striker Patrick Kluivert khelh dan phung chu in-zul deuha a hriat thu sawiin, "Kluivert kha kum naupangte ni chungin a puitling hma hle a, ṭha takin Barcelona tan a khel thei. Romelu pawh hi kum 23 chauha upa la ni chungin striker ṭha leh hlauhawm a ni der tawh - Kluivert ang kha a ni thei ang," tiin a sawi.

Kum 23-a upa Lukaku hian Everton tan league match 113 a khelh aṭangin goal 50 a khung tawh a, a tluk loh chu Tim Cahill (56 goals) leh Duncan Ferguson (60) te chiah an ni. Belgium tan match 52 a khelh aṭangin goal 17 a khung tawh bawk. Kluivert khan Netherlands tan match 79 aṭangin goal 40 a khung thei a ni.