Chanmari-in Chhinga Veng an draw
Mizoram Premier League Season 5 champion tum Chanmari FC-in an thuam ṭha ber nen kai thar Chhinga Veng lakah point khat an hlawh chhuak hram a, inkhel boruak sangah club pahnihin goal khat ve ve an khung a, red card pakhat ve ve an hmu bawk.
Lalsangzuala Hmar-in Ivorian forward Leonce Do-doz leh Nigerian defender Ugochukwu Godswill te inkhel bul ṭantu zingah telh mah se Chhinga Vengin MS Dawngliana goal hmangin hma an hruai a, Bawngkawn tlangval hian a club hlui Chanmari FC lamah minute 42-naah a tauh goal. Second half minute 10-naah Chanmari FC-in left back Ramfangzauva hmangin an chhang let a, goal dang a luh belh lo.
A ngai reng
Chanmari FC-in point khat an hmuh avangin pahnihnaah an dinhmun an sawhnghet a, point 20 hmuin an hnuaia awm Chanmari West leh Aizawl FC te ban phakah awm lo mah se Sanga hote hian hmahruaitu BVT point thumin an pha lo.
Chhinga Vengin an goal khung an hum theih loh avangin pasarihna aṭangin an la che sawn thei chuang lo a, point 10 hmuin semifinal lut turin an chunga awmte chet sual an chan a ngai.
Dodoz a hmuhnawm?
Ivorian forward Leonce Dodoz chuan a thiamna lantir turin hun rei a mamawh lo a,
ṭan aṭanga rei loteah uluk taka amah vengtu Chhinga Veng defender Emma Chigozie chu bumin Malsawmfela tan ball duhthusam a pe a, Ramhlun South tlangvalin keeper chiah hmachhawn mah se goal zawnah a pet lo!
Amaherawhchu Dodoz hi Chanmari tana inkawp sa Sawm-fela leh Lalruatfela Zote te nen tlarhmaah an indip buai deuh niin a lang a, field sir lama awm Vanlalbiaa Chhangte leh player thar Isak Vanlalruatkima te goal bawh a na tawk lo. Chutihrualin Chanmari tlarhma bil chhanah Chhinga Veng defender Emma Chigozie chet ṭhat vangah a ngaih theih bawk a, Nigerian defender hi man of the match-a thlan a ni.
Chanmari defender Ugo-a'n theihna sang tak a nei tih a lang a, chutihrualin Nigerian defender awm hnuah Sanga hoten clean sheet an la nei lo.
Dawngtea a te lo
Chhinga Vengin inhliam vangin striker lian ṭha Lal-khawpuimawia chhawr thei lo mah se, boruaka ball tauh turin Dawngtea a ṭha tawk.
First half tawp hma hretin captain Joseph Lalnunpuia freekick pet chu Bawngkawn tlangval Dawngtea hian nalh takin a tauh lut.
MPL1 top scorer Dawng-tea bakah hian winger H. Lal-muankima chu player hmuhnawm a ni a, MK-a hian a club hlui tlarhnung tan vawi tam harsatna a siam a, hun tawp lamah erawh a thamral.
Hun tawp hma hretin Dawng-tea hian Chanmari tlarhnung pal darhin MK-a tan ball ṭha bik a siam a, Bawngkawn tlangval hian vengtu nei lo mah se goal ruakah a thun ṭhelh.
An chhanglet
Chhinga Veng-in goal ven-him an harsat a, tun season-ah vawi thum chauh goal chhuah loin minute 90 chhung an hmang tluan.
Chanmari FC an khelh
ṭum hian second half ṭan aṭanga minute 10-na lekah R. Malsawmtluanga freekick pet chu Fela Zote-in tauh kawi lehin vengtu nei lo defender Zautea'n cool takin a khung.
Buaina leh red card
Chhinga Veng goal khung zawhah referee leh an khingpui inpeih hmain Chanmari FC-in an ṭan thut a, an goal khung chhang let nghalah inngai mah se pawm theih a ni lo. Referee-in ṭan turin hamrik a la ham lo a, hei bakah hian Chhinga Veng captain Joseph-a'n Chanmari ṭan an tum tih a hmuhin an khingpuite awmna lamah a tlan phei hman a, hei vang ringawt pawh hian ball nung a ni lo a, goal a pawm theih a ni lo.
Minute 87-naah buaina tenau a chhuak a, inkhel tihtawp a
ṭul. Chanmari tana goal khungtu Zautea chuan Chhinga Veng technical area lamah field chhunga bottle awm chu a chhir phei a, referee-in Chanmari defender a hrem hmain Chhinga Veng coaching staff leh player ṭhen-khat lungawi lo khelmual chhungah an lut. Hun rei lote chhung chawlh a nih hnuah Zautea hi yellow card red card pek a ni a, Chhinga Veng coaching staff khelmuala luttten mak takin hremna an hmu ve lo.
Injury time-ah Chanmari FC-in freekick an hmu a, Chhinga Veng winger MK-a'n subsitute Lalrosanga a veng. Player pahnih hi boruak sangah an talbuai tih a lang a, mawi lo khawpa an inman beh avangin referee-in a tih tur dik tak tiin red card a pe ve ve.
Eng nge an sawi?
Chhinga Veng coach Chawng----thansanga chuan, "Point khatah hian club pahnih hi kan lawm lo ve ve ang," a ti a, chutih rualin pahnihnain leh pasarihna inkhel an nih angin a lawmawm thawkhata a hriat thu a sawi.
Chanmari coach Sanga chuan, "Technical area chhuahsanin kan khingpui bench-a ṭhutte khan khelmual an lut a, an hremna ka hre châk tawh khawp mai," tiin hrem an phu thu a sawi.
An goal chhuah dan sawi zuiin Sanga chuan, "Khatiang goal kha chu a awm ve tur alawm," tiin a player hlui Dawngtea an ven hneh loh avangin a defender-te a sawisel duh lo.
Chanmari FC hian Thawhṭanni tlaiah phase 1-a an hneh tawh loh Chanmari West an hma-chhawn ang a, Chhinga Veng-in Thawhlehni zanah league hma-hruaitu Bethlehem Vengthlang an hmachhawn thung ang.
ZoFooty Statistics
Chanmari FC 1 - 1 Chhinga Veng FC
CFC : Ramfangzauva 55'
CVFC : MS Dawngliana 42'
MoM : Emma Chigozie, CVFC
49% Ball Possession 51%
14 Shot(s) 14
6 On Target 4
2 Yellow Card (s) 3
1 Red Card (s) 1
Powered By Rainbow Multibrand
Mobile Showroom
Tute nge inlan?
Chanmari FC (4-1-4-1) : F. Lalmuanawma; Lalmuanawma (C. Lalrosanga 65'), Lalrinchhana, Ugochukwu Godswill, Ramfangzaua; R. Malsawmtluanga; Isak Vanlalruatkima (Lalrinchhana 46'), Lalruatfela Zote, Malsawmfela, Vanlalbiaa Chhangte (Lalmuanzova 83'); Leonce Dodoz.
Chhinga Veng FC (4-4-2) : R. Lalhmangaihzuala; R. Laldinliana, K. Lalthlahlova, Emma Chigozie, Lalramfelpuia; Vanlallawma, Joy Mrona Khar Raswai (Paul Ramfangzauva 69'), Vanlalthanga, H. Lalmuankima; Joseph Lalnunpuia, MS Dawngliana