Cristiano dang an awm lo ang - Ronaldo

Real Madrid forward Cristiano Ronaldo chuan tun hnaiah player thar ṭha tak tak chhuak mah se amah ang chu engtikahmah an awm tawh loh tur thu a sawi.

Kum 31-a upa forward chuan, "Tumah hi Cristiano Ronaldo an ni thei tawh lo. Football-ah player in ang pahnih a awm theih lo a, keimah ang chiah player dang an rawn chhuak thei lo ang," a ti.

Portugal captain chuan sawi chhun-zawmin, "Europe-ah naupang si, talent nei
ṭha tak tak Renato Sanches, Andres Gomes leh Joao Mario te an awm a, duhthlan tur tam tak an awm. Tuna ka sawi ho pawh hi Portuguese ringawt an ni a, anni kher lo pawh hi Europe-ah player ṭha tak tak an awm avangin ka lawm a, football hi a la ṭhang dawn chauh tih hei hian a entir a ni," tiin player-te chu khaikhin chi an nih loh thu a sawi.

Ballon d'Or 2016 chawimawina dawng tura beisei kai ber Ronaldo chuan, "Ballon d'Or hi ka dawn dawn leh dawn loh ka sawi thei lo a, vote hi ka kuta innghat vek a nih loh avangin engmah sawi lawk theih a awm lo. He chawimawina hi dawn ka duh leh duh loh min zawh a nih erawh chuan ka chhanna chu 'duh e' tih hi a ni a, dawt sawi ka tum lo. Mahse, chawimawina dawn châka phi cheng erawh ka ni lo. Thil thleng tur chu a lo thleng mai ang. Kuminah Champions League leh Euro nomawi ka chawi a, ka kum ṭha ber ka hman avangin ka hlim a ni," tiin kumin chu football-a a kum ṭha ber a nih thu a sawi bawk.